"Турон" устози Денис Бушуев: "Мен жамоаларни Биринчи, Про ёки Суперлига вакили деб ажратмайман"

Денис Бушуев: "Бугунги ўйин ҳақида бир нима дейиш қийин. Пенальтидан гол урганимизда баҳс бошқача якунланиши мумкин эди. Биринчи бўлимда рақиб ўйинни назорат қилди. Майда паслар туфайли ҳимоядан чиқишга қийналдик. Иккинчи бўлимда оддийроқ ўйнаб, узун паслар орқали ҳаракат қилдик. Иккинчи таймни яхши ўтказдик. Мағлубиятга учраган бўлсакда, йигитларга раҳмат айтаман. Машғулотлардаги меҳнат эртами, кечми, ўз сўзини айтади ва очколар тўплашни бошлаймиз.

- Нега ёш Абега Энянг Нгуни майдонга туширмадингиз?

- Бугун ҳимоя қанотларида икки ёш футболчи ҳаракат қилди. Ҳаммани бирданига майдонга тушириб юборишнинг иложи йўқ. Ушбу баҳсга қилган режам асосида футболчиларни майдонга туширдим.

- Шоҳназар Норбеков нега бугунги ўйин қайдномасига киритилмади?

- Қайдномага 19 нафар футболчини киритса бўлади, бу баҳсга бошқаларни танладим. Лекин бу Норбеков жамоамизда ортиқча дегани эмас, ўйинлар кўп. Кейинги баҳсларда уни асосий таркибда кўришимиз мумкин.

- Кейинги баҳс Про Лига вакили "Шўртан"га қарши бўлиб ўтади.

- Мен жамоаларни ажратмайман. Биринчи, Про ёки Суперлигами ҳар бир рақибга қарши ўйин оғир ўтади. "Пахтакор" юқорида, биз эса пастда эдик, аммо ўйинни кўриб, бундай демаган бўлардингиз. "Шўртан"га қарши баҳс енгил кечмайд ва уни ўз фойдамизга якунлашга уриниб кўрамиз.