Туркман дербисида “Ахал”нинг ғалабали сериясига чек қўйилди

Мамлакат чемпионатининг марказий учрашуви – “туркман дербиси” мақоми остида ўтадиган “Ахал” – “Олтин Аср” жамоалари учрашуви аслида тақвим бўйича 11 март санасида ўтиши лозим эди. Аммо ТФФ қарори билан бу ўйин бошқа санга қолдирилди. “Олтин Аср” билан бўладиган ўйинга қадар “Ахал” кетма-кет тўрт ўйинда ғалаба қозониб келаётганди. Бу жиҳат ҳам беллашувга бўлган қизиқишни янада орттириши табиий эди. Мамлакатнинг икки кучли жамоаси ўртасидаги беллашувни 1500 нафар томошабин бевосита стадиондан туриб кузатиб борди.

Учрашувда ҳисобни 6-дақиқада “Олтин Аср”нинг собиқ ҳужумчиси Мурод Яхшиев очди. 29-дақиқада “Олтин Аср” форварди Олтимурод Аннадурдиев орадаги мувозанатни тиклади. Иккинчи бўлим ўрталарида Михаил Титов “Ахал” дарвозасини ишғол этиб, жамоасига ғалаба келтирди-1:2.

Шу тариқа “Ахал”нинг тўрт ўйиндан буён давом этаётган ғалабали сериясига чек қўйилди. Шунингдек, Хўжааҳмад Аразов жамоаси илк бор чемпионат баҳсларида ўз дарвозасидан гол ўтказиб юборди.

Ушбу ғалабадан кейин “Олтин Аср” 9 очко тўплаб, турнир жадвалининг учинчи поғонасига кўтарилди. “Ахал” эса 12 очко билан ҳамон жадвалда етакчилик қилмоқда. 

«Олтин Аср» – «Ахал» – 2:1 (1:1)

30 апрел 2020 йил. Ашхабад. «Ашхабад» стадиони. 1 500 томошабин.

Голлар: Олтимурод Аннадурдиев 29, Михаил Титов 57 — Мурад Яхшиев 6.

Огоҳлантириш: Ахмед Атаев 38 — Илья Тамуркин 27, Ихлас Сапармамедов 31, Байрамнияз Бердиев (мураббий) 36, Сердар Аннаўразов 44.

Учрашув ҳаками: Акмурат Курбанов (Ашхабад).

Қанот ҳакамлар: Ахмед Бегназаров (Марв), Полван Полвонов (Тошҳовуз).

Захира ҳаками: Арслан Гошшанов (Тежен).

Учрашув назоратчиси: Мақсад Сейиткулиев (Ашхабад).

Учрашув комиссари: Бердимурад Нурмурадов (Ашхабад).