Терма жамоа “Бунёдкор”да машғулот ўтказди

Осиё Кубоги-2015га тайёргарлик кўраётган Ўзбекистон миллий терма жамоаси Тошкентдаги йиғинга киришди. Мавсум якунига етганидан сўнг ташкил қилинган дастлабки йиғин 29 ноябрга қадар давом этади. Маълумки, бош мураббий Миржалол Қосимов ушбу йиғинга 23 нафар футболчини таклиф этган.



Чемпионат якунига етганидан бери футболчилар илк бор йиғилишгани боис дастлабки кун машғулоти жисмоний тикланишга қаратилди. Ўйинчилар асосан майдон бўйлаб югуриш машқларини бажаришди, тўп билан умуман ишланмади. Кейин эса стадион ҳудида жойлашган спорт залда аэробика машқлари бажарилди. Бу машғулотни терма жамоа мураббийлар штабига яқинда қўшилган Александр Волков ўтказди. Бош мураббий Миржалол Қосимовнинг айтишича, Тошкентдаги йиғин давомида назорат баҳси ўтказилмайди. Эртанги кун тартибидан тренажёр залида ишлаш ўрин олган. Терма жамоага чақирилганларнинг ҳаммаси соппа-соғ, жароҳат олганлар йўқ.





Эслатиб ўтамиз, терма жамоа аъзолари 1 декабрь куни йиғинни давом эттириш мақсадида БААга жўнаб кетишади. Январда бўлиб ўтадиган Осиё чемпионатида Ўзбекистон термаси гуруҳ ўйинларида Саудия Арабистони, Хитой ва КХДРга қарши баҳс олиб боради.