Супер Зидан ёхуд 6/9

“Реал” ажойиб мураббийга айланиб улгурган Зидан қўл остида охирги ярим йилда олтинчи совринни қўлга киритди. 

Ёшлигимда кўп бор: “Буюк футболчилардан кучли мураббий чиқмайди” деган гапни эшитардим. Бир қарашда чиндан ҳам бу фикр асослидек. Аммо аслида вазият қандай? Менимча, буткул чиқмайди эмас, ўша кучли футболчи бўлганлардан саноқлиларигина мураббийлик курсисида ҳам мақтанишга арзийдиган натижаларга эриша оладилар, аммо муҳими улар бор.

Кўпинча фаолиятини тугатган кучли футболчи, мураббий бўлармикин деган савол туғилади мухлисларда. Шу тариқа унинг мураббийлик даври – футболчилик фаолияти билан тўхтовсиз солиштирилаверади. Бироқ аслида бу бироз нотўғри таққослаш эмасми? Сабаби, истаган касбингизни танланг, у хоҳ буюк рассом бўлсин, хоҳ архитектор, қурувчи ва ёки яна бошқа бир касб устаси. Ўзи ишини қойиллатиб бажаргани, қобилияти, тажрибасию, керак бўлса фантазияси ўнлаб ҳамкасбларини бошқаришда ёрдам бера оладими? 

Назаримда, футболчининг майдонда тўпни қандай тепганию, қандай натижаларга эришгани фаолиятини якунлагач, мураббийлик ишида ҳал қилувчи роль ўйнамайди. Барча тан берадиган мураббий бўлиш учун ўзига хос характер, жамоани бошқара олиш қобилияти, албатта профессионал билим, соҳадаги тажриба ва мураббийларга хос бўлган сезгирлик бўлиши зарур. Зидан, ана шу жиҳатларнинг барини ўзида жамлай олган чоғи. 

Супер старт ёхуд 6/9

Бу қандай рақамлар бўлди? “Реал”нинг ашаддий мухлислари гап нимадалигини тушуниб етишган бўлса ажаб эмас. Ҳа, бу Зидан бош мураббий бўлганидан кейин жамоа ютган совринлар. Бундан келиб чиқадики, француз ютқизганидан кўпроқ соврин ютибди.

Зидан бошчилигида ютилган совринлар (2016-2017): Чемпионлар Лигаси (2), Ла Лига, УЕФА Суперкубоги (2), Клублар ўртасидаги жаҳон чемпионати.

Зидан бошчилигида бой берилган совринлар (2016-2017): Ла Лига, Қирол Кубоги (2).

Ҳайратланарли, шундай эмасми? Айниқса, кетма-кет ютилган Чемпионлар Лигаси, унақаси айнан Чемпионлар Лигаси (унгача Чемпионлар Кубоги эди) тарихида ҳали ҳеч қачон бўлмаганини яна бир бор эслатиш шарт эмас чамамда. 

Яқин кунлар ичида мураббий Зидан коллекциясига яна бир соврин қўшиб қўйиши мумкин. Бунинг учун мадридликлар Испания Суперкубоги доирасида икки учрашув натижасига кўра “Барселона”ни енгишлари зарур. 

Айнан каталониянинг бош жамоаси “Барселона”да бир неча йил аввал мураббийликда Зиданникидан қолишмайдиган, керак бўлса унданда яхшироқ старт олган Пеп Гвардиола ишлаганди. У бош мураббий бўлгач, “Барса” дастлабки 6 мусобақанинг барчасида ва 9 турнирнинг 7тасида (дастлабки икки йил ичида) зафар қучган. Аммо шу ўринда қайд этиш лозим, Хосеп Чемпионлар Лигасида чемпионлик унвонини ҳимоя қила олмагани, Зидан эса бунга эришгани француз ишини янада қадрлироқ қилади. 

Гвардиола бошчилигида ютилган совринлар (2008-2010): Чемпионлар Лигаси, Ла Лига (2), Қирол Кубоги, УЕФА Суперкубоги, Испания Суперкубоги, Клублар ўртасида жаҳон чемпионати.

Гвардиола бошчилигида бой берилган совринлар (2008-2010): Чемпионлар Лигаси, Қирол Кубоги.

Замонавий футболнинг икки буюк мутахассислари қандай старт олганини бевосита кўра олганимиз, бизнинг бахтимиз албатта. 

Қайд этиш лозим, Зиданнинг серияси ҳали давом этиши мумкин. МЮ устидан қозонилган ғалабадан кейиноқ интервью чоғи Зизу шундай деди: “Жамоамизнинг ўзига хос характери бор, биз ҳамон катта ютуқларга, совринларга эга чиқиш ниятидамиз. Ютиб чарчамаймиз, буни орзу ҳам қилманг!” 

“Реал” учун янги Дель Боске
Дон Висенте бутун фаолиятини ўтказган жонажон жамоаси бош мураббийи бўлишни узоқ кутди ва ниятига етгач, уни катта ғалабалар сари етаклай олди. Зидан ҳам “Сантьяго Бернабеу”да ўйнаган, мураббийлик лавозимига Дель Боскега нисбатан секинроқ келган бўлсада, бу икки инсон фаолиятида қандайдир ўхшашлик бордек. Ёки ўша ўхшашлик уларнинг иш олиб бориш услубидадир. Зидан, Дель Боске ва Анчелотти – “Реал” учун Чемпионалр Лигасининг охирги 5та кубогини ютиб берган мураббийлар. Уларни фақатгина шу жиҳат бирлаштириб турмайди. Зизу худди дон Висенте ва дон Карло сингари оғир босиқ, жуда ақлли мураббий. У Гвардиолага ўхшаб “тўнтариш” уюштириб, ўзгача бир услубни яратиб, қаерга борса, янги футболчиларга тўғри келса, келмаса тарғиб қилавермайди.

Бир қарашда Зидан оламшумул иш бажармаётгандек. У шунчаки қўл остидаги футболчиларни улар яхшироқ ҳаракат қиладиган нуқталарга қўйиб чиқяпти ва ўзларини кўрсатишларига имкон бермоқда. Имкон берилса, шу ишни ҳар биримиз Зидандан қолишмай, бажариб қўядигандек. Четдан қараганда шундай осон туюлади, аслида эса бунинг замирида улкан меҳнат ётибди. Зизу чиндан ўз ишининг усталари бўлган ва Зидан хоҳ ўйинчи, хоҳ ёрдамчи мураббий сифатида биргаликда ғалабаларга эришган устозларини эслатиб юборяпти. 

Энг қизиғи, футболчилик вақтида кўп бор “ишкал”ларга аралашиб қолаверадиган, унча-мунча жанжалда гапдан қолмайдиган, керак бўлса “калла қўйворадиган” Зидан, ўта босиқ, доимо хотиржам мураббийга айланган. Айнан у доим нимадир бўлиб, хунук хабарлар ошкор бўладиган, келишмовчиликлар бўлиб турадиган “Реал” (бевосита жамоа) ичида тинчлик ўрната олди. Ажойиб ички муҳит, ижобий натижалар ва барча ўйин амалиётига эга бўладиган, ҳеч ким (деярли) нолиб кетиб қолмайдиган кучли ва оёқда дадил тура оладиган жамоа қурди Зидан. “Қироллик клуби” анча вақтдан бери бундай қудратга эга эмасди. Браво, Зидан!

Омонжон Тўхтамирзаев