Шацких: "Вице-президент қарорига кўра мавсум охиригача майдонга тушмас эканман"

Футбол 1 телеканалининг хабарига кўра, Максим Шацких, Андрей Хомин ва Олег Герасимюк бу мавсумнинг кейинги ўйинларида иштирок этишмайди.

"Мен билан мураббий гаплашди. Унга клуб вице-президенти телефон қилиб бизни майдонга туширмасликни айтибди. Ҳозирча бунинг сабабини билганим йўқ", - дейди Максим Шацких.

"Мураббий айтганидек жамоа билан машғулот ўтказаяпман, лекин қолган ўйинларда иштирок этамас эканман. Машғулотларда қатнашавераман, "Говерла" билан яна бир йиллик шартномам бор".

Клуб вице-президенти эса бу хабарни тўқима деб айтмоқда. 

"Шахсан мен бош мураббийнинг қарорига аралаша олмайман. Шу боис бу хабар ёлғон. Мен Вячеслав Викторовичга фақат таклиф беришим мумкин, лекин қандайдир таъқиқ қўя олмайман. Бу умуман ёлғон", - дейди Александр Шуфрич.

Жамоа бош мураббийи Вячеслав Грозний Шацкихнинг қайдномадан ўрин олмаслигини шундай изоҳлади:

"Шацкихнинг иссиғи бор эди, у бир ой майдонга туша олгани йўқ. Текширув унинг касаллигини аниқлай олмади. Уни "Черноморец"га қарши бир тайм ўйнатиб кўрдим, аммо ўз даражасига қайта олмаган экан. Бундай тажрибали футболчини захирада ушлаб ўтиришдан қандай маъно бор?".