Сервер Жепаров: "Йигитлар учун хурсанд бўлдим"

- Саудия Арабистони билан бўлган ўйин ҳақида нима дея оласиз?
- Гарчи майдонга тушмаган бўлсам-да, йигитлар учун хурсандман. Саудия Арабистони терма жамоасини мағлуб этиб кейинги босқичга чиқдик ва мухлисларга катта қувонч улашдик десам бўлади. Энди бўлса бор эътиборни Жанубий Кореяга қарши кечадиган баҳсга қаратамиз.

- Ўзбекистон учун Жанубий Корея билан ўйин қандай аҳамиятга эга?
- Бу учрашув биз учун муҳим аҳамиятга эга деб бемалол айта оламан. Жаҳон чемпионати саралаш ўйинларида улар билан бир хил очко тўпладик, бироқ тўплар нисбатига кўра мундиалга бора олмадик. Энди бўлса ўша мағлубият аламини олмоқчимиз.

- Ўзбекистон кореяликларга қарши охирги ўнта ўйиннинг иккитасида дуранг ўйнаб, саккиз бор мағлубиятга учраган.
- Ҳа, бундан хабарим бор. Албатта, бизда босим юқори. Қолаверса, Жанубий Корея Осиёнинг энг кучли жамоаларидан бири ҳисобланади. Улар мунтазам жаҳон чемпионатларида қатнашиб келишади. Лекин бу - футбол ва эртага ким ютишини айтиш қийин.

- Осиё чемпионатида Ж.Корея иштирокидаги бирорта учрашувни кўрдингизми?
- Ҳа. Уларнинг Австралияга қарши ўйинини томоша қилдим. Менимча, бу ўйин мусобақадаги ҳозирча энг қизиқарлиси бўлди.

- ЖЧ-2014 саралашидаги Корея билан ҳозиргиси ўртасида қандай фарқ бор?
- Ҳозирги жамоанинг ўйин услуби бироз ўзгарган. Олдин кореяликлар узун паслар орқали ўйнашарди. Ҳозир эса тез-тез пас бериб ҳаракат қилишмоқда.

- Рақиб сафида кимнинг ўйинини кузатяпсиз?
- Алоҳида бир футболчини ажратиб кўрсатмоқчи эмасман. Жанубий Корея сафида Европада тўп тепаётган легионерларнинг ҳаммаси кучли. Аммо энг кучлиси ким деган саволга жавоб топиш қийин, қолаверса, мен бу саволга жавоб бера олмайман.

- Ўтган мавсум К-лигадаги фаолиятингизни қандай баҳолайсиз?
- Жамоамизда кўп марта мураббий алмашди. Бу эса ўйинимизга таъсир қилмай қолмади. Аммо Кубокни қўлга киритганимиз яхши бўлди.