Сардор Мирзаев: "Бўлажак иккита ўйинда вазиятни ўнглашимиз шарт"

- "Машғулотлар асосан тўп билан ўтмоқда. Кўпинча "квадрат" ҳамда дарвозага зарба беришга асосий эътибор қаратилмоқда. Фикримча, ўзбекистонлик футболчилар тўп билан ўйнашни ёқтиришади. Абрамовнинг услуби ҳам шунга монанд. Умуман терма жамоамиз тўп билан ўйинда ўзининг кучли тарафларини ишга солиши мумкин. Ўзгаришлар яхши тарафга хизмат қилади, деб ўйлайман. Бўлажак икки ўйин кўп нарсани кўрсатиб беради. Ўзбекистон терма жамоаси Яман ва Сингапурга ўхшаган жамоаларни мағлуб этиши шарт. Биз гуруҳдаги қийин вазиятдан чиқиб кетишимиз керак. 

Машғулотларда қувноқ кайфият сезилмаяпти? Бу нарса ниманидир билан боғлиқ деб ўйламайман. Ҳамма ўз ишини қилмоқда. Ташқаридан муҳит қандай кўринаётгани ҳақида бирор нарса дея олмайман. Лекин ичкарида муҳит яхши. Барча ўзаро таниш футболчилар. Балки терма жамоада муҳит ўзгарганига кўпчилик бошқа нарсага чалғимасдан асосий эътиборни машғулотларга қаратаётгани учун шунақа туюлаётгандир", - дея терма жамоанинг иккинчи кунги машғулотларидан кейин Сардор Мирзаев ўз фикрларини билдирди.