Рустам Мирсодиқов: “Насаф”дан бир очко олиш – яхши натижа”

-Қаршида “Насаф”дан бир очко олиш бу менимча, яхши натижа. Албатта ўйин осон бўлгани йўқ,- дея гап бошлади меҳмонлар устози. -  Ўйинни чўздик? Йўқ мен ундай демаган бўлардим. Чунки футбочлиларга ҳар доим айтаман: бир дақиқагаям майдондан чиқдингми, бу жамоа учун йўқотиш. Рақиб бундан фойдаланиши мумкин. Шу боис футболчиларимиз атайлаб ўйин вақтини чўзиш учун майдонга ётиб олишмади.

-“Металлург” одатда етакчи жамоаларга ҳар доим жиддий қаршилик кўрсатади...
-Ўтган турда “Нефтчи” ҳам “Насаф”га қарши ёмон ўйин кўрсатмади. Демоқчи бўлганим, “Бунёдкор”, “Пахтакор”, “Насаф” сингари кучли жамоаларга қарши ҳар бир жамоа ўзини кўрсатгиси келади. Масаланинг яна битта томони, майдоннинг ҳолати. Аввалги турда сафарда “Бухоро”га қарши ўйнадик. У ердаги майдон билан Қаршидаги майдонни фарқи жуда катта. Майдоннинг ҳолати ҳам бизга яхши ўйнаш имконини беради... “Насаф”га қарши албатта биринчи навбатда гол ўтказмазлигимиз шарт эди ва Қарши ҳужумда имконият бўлишини кутдик. Бизда ҳам гол уриш имконияти бўлди. Аммо бундан фойдалана олмадик.

-Бугунги ўйини билан дастлабки 4 турда мағлуб бўлган “Металлург”ни тасаввур қилиб бўлмайди. Олдинги турларда жамоага нима етишмаганди?
-Жисмоний томондан жамоамизда муаммо йўқ. Туркияда йиғин ўтказиб, кучли жамоалар билан куч синашдик. Тақвим бўйича илк ўйинни уйда ўйнашимиз лозим эди. Аммо маълум сабаблар билан сафарда ўйнадик. Самарқандда эса бизда вазият кўп бўлди, аммо мезбонлар вазиятдан унумли фойдаланишди. Бухорода эса сўнгги дақиқаларда пеналтини аниқ амалга оширолмадик ва аламли мағлубият. Футболда шунақасиям бўлади.