Рустам Ашурматов: “Гвангжу” сафида яхши ўйин кўрсатиб терма жамоадан чақирув олмоқчиман

Айни пайтга келиб, ҳамюртимиз К2 лигада 12 та учрашувда майдонга тушиб, 1 бора рақиблари дарвозасини ишғол этишга муваффақ бўлди. “Гвангжу” ҳозирда 17-турдан сўнг 39 очко жамғарган ҳолда мусобақа жадвалида якка пешқадам бўлиб турибди.

Ўзбекистонлик ҳимоячи ЎФА расмий сайтига Жанубий Кореяда ишлари қандай кетаётгани хусусида гапириб берди:

“Гвангжу” сафига келиб қўшилганимга 6 ой бўлиб қолди ва жамоага ҳамда чемпионатга анча мослашиб улгурдим, дея оламан. Тўғриси, бошида бироз қийинчилик ҳам бўлди. Зеро илк марта легионер сифатида фаолият олиб боряпман. Лекин жамоадошларим, мураббийларимиз ҳар тарафдан кўмак бериб туришди ва эндиликда барчаси жойида.

К2 лига баҳслари ҳам анча шиддатли ва жамоаларнинг барчаси юқори дивизионга чиқиш учун жиддий кураш олиб боришади. Чемпионат савияси яхши эканини таъкидлай оламан. Ҳар бир клубда 3-4 нафардан яхши савиядаги легионерлар фаолият олиб боради.

Бизнинг клубимиз олдига ҳам К1 лигага йўл олиш вазифаси қўйилган. Ушбу вазифани уддалашга ва юқори лигага йўлланма олишга бор куч-ғайратимизни ишга солган ҳолда ҳаракат қиламиз. Айни пайтда жамоамиз мусобақа жадвалида 1-ўринда бормоқда. Биз мавсум сўнггига қадар ушбу ўринни сақлаб қолишга ва олдимизга қўйилган вазифани уддалашга уринамиз.

Мен ҳам имкон қадар яхшироқ ўйнашга ва жамоамиз муваффақиятларига хисса қўшишга интиляпман. Энг асосийси – мен намойиш этадиган ўйин мухлислар ва мураббийларимизга маъқул келиши лозим. Легионер футболчидан ҳамиша маҳаллий футболчилардан кўра кўпроқ нарса кутишади. Шу сабабдан легионерлар бор маҳоратини ишга солиб ўйнаши талаб этилади.

Ҳозирги пайтда Жанубий Кореяда 5 нафар ҳамюртимиз фаолият олиб боряпти. Улар билан доим алоқадамиз. Ўзбекистонлик футболчилар ўйнайдиган жамоаларга қарши ҳам ўйинлар ўтказдик. Лекин ҳали майдонда дуч келмадик. Чунки жароҳат сабаб ҳамюртларимиз ўша ўйинларда иштирок эта олишмади.

Айни дамдаги асосий мақсадим клуб сафида яхши ўйин кўрсатиш ва бу орқали терма жамоамиздан чақирув олиш. Қолаверса, мавсум якунида Жанубий Корея К1 лигасига йўл олишни кўзлаганмиз, - деди маҳоратли футболчи.