Руслан Аҳмедов: "Локомотив" Осиё даражасидаги идеал майдонга эга клуб ҳисобланади"

"Рақиб Суперлига жамоаси. Уларни ғалаба ва кейинги босқич йўлланмаси билан табриклайман. Охирги дақиқада қулай вазиятдан фойдаланганимизда, балки дурангга эришардик. Суперлига жамоалари билан курашиш қийин. Даража фарқ қилади. Битта гол урдик, лекин якунда тажриба ўз сўзини айтди", – дея гап бошлади Аҳмедов.

- "Хоразм"нинг Ўзбекистон кубоги гуруҳ босқичидаги иштирокини умумий қандай баҳолайсиз?

- Олдимизга гуруҳдан чиқиш вазифаси қўйилмаганди. Суперлига жамоалари билан кучимизни текшириб олмоқчи эдик. Қайсидир маънода бунга эришдик.

- Легионер футболчи Рокки Марчианонинг ўйини борасида нима дея оласиз?

- Эндигина иккинчи учрашувида майдонга тушди. Тактик жиҳатдан хатолари бор, албатта. Иккинчидан, тил билан боғлиқ муаммога урчамоқда. Олдиндаги ўйинларда жамоамизга ёрдам беради

-  "Хоразм" рақибларни сунъий майдонда қабул қилади. Бугун идеал майдонда тўп тепди. Бунинг фарқи борми? 

- "Локомотив" Европа бўлмаса ҳам, Осиё даражасидаги идеал майдонга эга клуб ҳисобланади. Тўп ҳам тез ҳаракатланади. Суъний майдонда аксинча. Барча жамоалар шундай майдонда ўйнаса, футбол савияси ҳам кўтарилади. 

- Икки жамоа ҳам кўплаб вазиятлардан фойдалана олмади. Клубларга Анвар Бердиев, Максим Шацкихга ўхшаган ҳужумчилар керакми ёки шунчаки вазиятларда совуққонликми?

- Яхши ҳужумчи Суперлигада ҳам муаммо. Охирги йилларда Анвар Бердиев, Александр Гейнрихга ўхшаган ҳужумчилар чиққани йўқ. Барчаси умумий тизим билан боғлиқ. Ёшлигидан тайёрлаш лозим. Ҳозир футбол универсаллашиб боряпти. Аввалги тизим индивидуал ҳаракатлар асосига қурилганди.