Руни: "Фергюсоннинг тактикаси хато эди. Биз "Барса"га қарши тенгма-тенг ўйнаймиз деб иккита финални бой берганмиз"
03 авг 2020 14:20
Янгиликлар

Руни: "Фергюсоннинг тактикаси хато эди. Биз "Барса"га қарши тенгма-тенг ўйнаймиз деб иккита финални бой берганмиз"

"Манчестер Юнайтед" собиқ ҳужумчиси Уэйн Руни "Барселона"га қарши ЧЛдаги ўйинлар ҳақида эслади.

МЮ ЧЛ финалида 2008/09 ва 2010/11 йилги мавсумларда "Барселона"га ютқазган.

"Реал"дек клубларга қарши "Биз уларга тўпни берамиз" деб чиқиш доим қийин. "Юнайтед"да ҳам шундай. Биз "Барселона"га қарши тенгма-тенг ўйнаймиз, прессинг қиламиз ва шу орқали ютамиз деб икки ЧЛ финалини бой берганмиз. Бу ўзини ўлдиришдек гап.

Алекс Фергюсоннинг гапларини эслайман: "Биз "Манчестер Юнайтед"миз ва биз ҳужум қиламиз. Бу клубимизнинг маданияти". Ўшанда ўйлагандим: "Бунга унчалик амин эмасман".

Ўйинчилар ич-ичларидан бу хато эканлигини ўйлашган. Албатта, шундан сўнг икки ўйинда ҳам ютқазганмиз.

Клуб ҳақидаги сўзлар тўғри, аммо кейин ўтирасан ва ўйлайсан: "Биз ютқаздик". Мен Чемпионлар Лигасини ютиш учун қанақа услубда ўйнашнинг фарқи йўқ деб ҳисоблайман", - дейди Руни.