Рўзиқул Бердиев: “Рақиб ҳақли ғалабага эришди”

"Локомотив" жамоаси бизни ҳақли равишда мағлуб этиб кетди. Мен бугунги ўйинда ҳимоячиларимизнинг ўйинини умуман тушунмадим. Ҳозирча фақат "Локомотив" жамоасини ғалаба билан табриклашим мумкин. Айни пайтда Вадим Абрамов жамоаси таркиб жиҳатидан ҳам, ўйин борасида ҳам анча мукаммал даражага чиқишган. Чемпионатимиздаги энг кучли клуб бу сўзсиз "Локомотив" жамоаси.

-Бугунги мағлубиятдан сўнг "Насаф" чемпионлик пойгасидан чиқиб кетди деб ўйлайсизми?
- Агарда шундай ҳаракат қилаверсак, ҳа. Бугунги ўйин билан учинчи ўриндаги баҳсни бой бериб қўйишимиз мумкин. "Локомотив"га қарши ўйин сўнгги икки йилдаги энг ёмон учрашувимиз бўлди.

-Элдор Суюновнинг жароҳати қанчалик жиддий?
-Дарвозабонимиз кутилмаганда оёғидан жароҳат олди. Ўйлайманки, Суюнов кейинги ўйинларда бизга ёрдам бера олади.

-Фарруҳ Сайфиев алмаштириб бўлмайдиган футболчилар сирасига кирадими?-Бизда алмаштириб бўлмайдиган футболчининг ўзи йўқ. Фарруҳ Сайфиев сўнгги пайтларда анча ўсишга эришди. Лекин кўпчилик унинг тўп билан ҳаракати ва вазиятига қараб баҳо беради. Аммо унинг тўпсиз ҳаракатлари ва жамоа учун ишлаши мени қаноатлантиради. Таркибимизда кўплаб футболчилар йўқ. Шоҳруҳ Гадоев яқиндагина жароҳатидан қутилди. Ундан бошқа захирамизда қанотларда ўйнай оладиган ярим ҳимоячилар йўқ.