Россия Бишкек ва Тошкент мезбонлигидаги CAFA чемпионатида қатнашиш учун ҳали шартнома тузмаган

Бу ҳақда "Фергана" вазиятдан хабардор манбага таяниб хабар бермоқда.

Манбага кўра, РФИнинг беқарорлиги туфайли, хусусан, Осиё термаларидан бири бўлиши керак бўлган турнирнинг саккизинчи иштирокчисини таклиф қилиш борасидаги ишлар тўхтаб қолган. 

"Газпром" CAFA чемпионати ҳомийси бўлиши ҳақидаги маълумотларга келсак, бу ҳали тасдиқланмаган. 

"Бу миш-миш. Ҳамма РФИнинг расмий қарорини кутмоқда", – деди манба.

Агар РФИ мусобақада иштирок этишдан бош тортса, Россия терма жамоаси бошқа Осиё жамоаси билан алмаштирилади.

РФИ қарорини Эрон томони ҳам кутмоқда, бу вазиятни тушуниш Осиё Кубоги ва Жаҳон чемпионати саралашида иштирок этишга тайёрланаётган миллий терма жамоа тақвимини аниқроқ шакллантириш учун зарур.

Биринчи CAFA чемпионати 9-21 июнь кунлари Бишкек ва Тошкент шаҳарларида бўлиб ўтади. Унда 8 та жамоа иштирок этади. Шу кунгача CAFAнинг барча 6 аъзоси — Афғонистон, Эрон, Қирғиз Республикаси, Тожикистон, Туркманистон ва Ўзбекистон чемпионатда иштирок этиш учун дастлабки розиликни берган. Россия еттинчи, Осиё жамоаларидан бири саккизинчи қатнашчи бўлиши кутилмоқда.

Мусобақа регламентига кўра, 8 та жамоа икки гуруҳга бўлинади. Бир гуруҳ ўйинлари Тошкентда, иккинчиси Бишкекда ўтказилади. Гуруҳ ғолиблари финалда тўқнаш келишади. Ўз квартетларида иккинчи бўлган жамоалар чемпионатда учинчи ўрин учун кураш олиб боради. Ҳар икки ҳал қилувчи учрашув Тошкентда бўлиб ўтади.