Қатар Европага "ўтганидан" бери қандай ўйнаяпти?

Қатар саралашнинг "A" гуруҳидан жой эгаллаган ва ўз ўйинларини ўртоқлик сифатида, яъни конкурсдан ташқари ўтказмоқда. Шунда бу гуруҳда жаҳон чемпионатига бориш учун 5та жамоа курашяпти: Сербия, Португалия, Люксембург, Ирландия ва Озарбайжон. 

Маълумки, Қатар ёзда "Gold Cup" мусобақасида иштирок этди. Сентябрдан бошлаб эса фақат ўртоқлик учрашувларида қатнашяпти. Феликс Санчес шогирдлари ҳозирча 5та ўйин ўтказиб, 4 бор мағлуб бўлди ва бир марта дуранг ўйнади. 

1 сентябрь. Қатар - Сербия 0:4

4 сентябрь. Қатар - Португалия 1:3

7 сентябрь. Люксембург - Қатар 1:1

10 октябрь. Португалия - Қатар 3:0 

12 октябрь. Ирландия - Қатар 4:0 

Кўриб турганингиздек, дуранг аутсайдер Люксембург билан қўлга киритилган. Қолган ўйинларда эса фақат мағлубият кузатилди. Осиё Кубогининг амалдаги соҳиби Қатар охирги йилларда анча кучайганини биламиз. Лекин Европа барибир бошқа даража. Буни Қатарнинг Сербия ва Ирландияга 0:4 ҳисобларида ютқазгани ҳамда Португалиядан ҳар иккала ўйинда 3тадан гол ўтказиб юборгани айтиб турибди. 

ЖЧ-2022 мезбони шу ойнинг ичида яна 3та ўртоқлик учрашувида майдонга тушади. Бугун Қатар иккинчи бор Сербия билан ўйнайди.

11 ноябрь. Сербия - Қатар

15 ноябрь. Озарбайжон - Қатар

30 ноябрь. Қатар - Баҳрайн