Питер Хюистра: "Яқинда раҳбарият билан келажагим ҳақида гаплашаман. Балки бугунги мағлубият музокараларга таъсир қилар"

"Учрашув қийин тарзда ўтди. Чиндан ҳам анча тер тўкдик. Қизил карточкага қадар жамоамиз яхши ўйин кўрсатаётган эди. Лекин нима учундир ушбу вазиятдан сўнг ўйинимиз тўхтаб қолди. Умуман олганда ўйинда карточкалар кўп бўлди. Ҳакам бугун карточка кўрсатиш бўйича саҳийлигини намоён қилди. "Насаф" эса сўнгги учрашувдек ҳаракат қилди. Бир киши кам бўлиб ҳам ғалабани ўз томонига оғдира олди. Мавсумни яхши ўтказдик. Бироқ кубок финалидаги мағлубият дилни хира қилади",- дейди Питер Хюистра.

- "Пахтакор"га бугун нима етишмади? Чемпионатда охирги турлардаги мағлубият руҳий томондан таъсир қилганмиди?
- Менимча мағлубиятнинг асосий сабаби айрим футболчилар асабийлаша бошлашди. Бундай паллада сабрли бўлиш ва диққатни жамлаш зарур. Бу футболда бўлиб туради. Қолаверса "Насаф" жамоаси яхши ўйнаганини таъкидлаш жоиз. Улар охиригача курашди. Футболда битта хато билан учрашув тақдирини ўзгартириб юборади.

- Қизил карточкадан сўнг ўйинимиз яхши чиқмади, дедингиз. Ўйинни кўрмаганлар худди "Пахтакор" футболчиси майдондан четлатилгандек тасаввур хосил қилади. Бу ҳолат фойда бериш ўрнига "Пахтакор"га халақит қилдими?
- Ўйинни қандай кечишини олдиндан билмайсиз. Бир жиҳатга урғу бериш керак. Масалан бугунги ўйин тақдири шундай ёзилган экан. Футболчиларимиз ўйинни назорат қилиш ўрнига кетма-кет хатоларга йўл қўйишди. Якунда бу натижага таъсир қилди. Рақиб ўзини яхши кўрсата олди. Футболчилар ҳам ҳакамлар каби VAR тизимига мослашиши керак. Буни ўрганишлари лозим.

- Жамоадаги аксарият футболчилар учун кубок финали сўнггиси бўлиши мумкин. Бугунги баҳс сиз учун охиргиси эмаслигини ишонч билан айта оласизми?
- Яқин кунлар ичида жамоа раҳбарияти билан келажагим борасида гаплашиб оламан. Кўп нарса факторларга боғлиқ. Дейлик режалар, бюджет ва ҳоказо. Балки бугунги мағлубият музокараларда ўз таъсирини ўтказиши мумкин.