Осиё Кубоги-2015. БАА - Қувайт баҳси ўтказилмади

Мусобақанинг очилиш учрашуви Австралия ва Қувайт терма жамоалари ўртасида бўлиб ўтади. "С" гуруҳида баҳс олиб борадиган БАА термаси мусобақа олдидан ўзининг охирги учрашувини Қувайтга қарши ўтказиши лозим эди. Бироқ битта сабаб туфайли ўртоқлик ўйини ўтказилмай қолди.

Гап шундаки, Канберрада бўлиши керак бўлган баҳс олдидан иккала жамоа аъзолари майдонга чиқиб келишди. Футболчилар ўйинни бошлашга тайёр туришганди, бироқ БАА бош мураббийи Маҳди Али рақиб жамоа ходими ўйинни видеоёзувга туширмоқчи бўлганини кўргач, ўртоқлик ўйини ўтказишдан бош тортди.

Шундан сўнг ўртада бироз тушунмовчилик юзага келди. Қувайтликлар бу оддий ўртоқлик ўйини бўлса, биз видеога олиб кейинчалик ўз футболчиларимизнинг ҳаракатини ўрганиб чиқмоқчимиз дегани билан Маҳди Али бунга кўнмади ва шогирдларини майдонга туширишдан бош тортди. Натижада назорат баҳси ўтказилмай қолиб кетди. Эслатиб ўтамиз, БАА термаси ўз гуруҳида Эрон, Баҳрайн ва Қатарга қарши баҳс олиб боради.

Х.Холиқов