ОФК президенти Ўзбекистон футзал миллий терма жамоасини Осиё Кубогида қўлга киритилган учинчи ўрин билан қутлади

Осиё футбол конфедерацияси президенти Шайх Салмон бин Иброҳим ал Ҳалифа Ўзбекистон футзал миллий терма жамоасининг Осиё Кубогида бронза медалини қўлга киритгани муносабати Ўзбекистон футбол ассоциацияси президенти Абдусалом Азизов номига табрик йўллади.

"Кувайтда бўлиб ўтган футзал бўйича Осиё Кубогида учинчи ўринни қўлга киритганингиз билан сизни ва Ўзбекистон футбол оиласини чин қалбимдан табриклашдан мамнунман.

Ўзбекистон футзал миллий терма жамоасининг мусобақа давомида кўрсатган ажойиб ўйинлари Ўзбекистон футбол ассоциацияси томонидан футзални ривожлантириш ва оммалаштириш йўлида амалга оширилган меҳнат ва саъй-ҳаракатларидан далолатдир.

Баҳодир Аҳмедов ва бутун жамоага турнир давомида намойиш этган ёрқин ўйинлари учун миннатдорчилик билдираман.

Бу ғалаба жамоани келажакда янада катта муваффақиятларга эришишга ундашига ишонаман.

Ўзбекистон футбол жамоатчилигига эса келгуси фаолиятида зафарлар тилайман", – дейилади ОФК президентининг табригида.