ОЧЛ. “Бунёдкор”да олтита ўйиндан бери ғалаба йўқ

Натижада “Бунёдкор”нинг уй учрашувларидаги ғалабасиз серияси 6тага етди. Шу пайтгача “Бунёдкор” ўз майдонида беш ўйиндан бери ғалаба қозона олмай келаётганди ва бу ҳақда кеча маълумот бергандик.

Албатта, бундай кўрсаткич олий лигамизнинг амалдаги чемпиони учун яхши эмас. “Бунёдкор” бир пайтнинг ўзида ҳам Ўзбекистон чемпиони, ҳам Кубок ва Суперкубок эгаси ҳисобланади. Шундай экан, кўпчилик бу жамоадан халқаро учрашувларда ҳам ғалаба кутади. Статистика шуни кўрсатяптики, “Бунёдкор” ОЧЛ баҳсларида охирги бор ўз майдонида 2012 йилнинг 3 октябрида ғалаба қозонган экан. Мусобақанинг чорак финал баҳсида Австралиянинг “Аделаида Юнайтед” клуби устидан 3:2 ҳисобида. Шунда ҳам ўйиннинг асосий вақти 2:2 ҳисобида якунига етган.

Ана ўшандан бери Миржалол Қосимов шогирдлари ОЧЛдаги уй беллашувларида ғалаба нималигини билмай келишяпти. Жамоа шундан бери ўз уйида “Ульсан Хюндай”, “Поханг Стилерс”, “Бейжинг Гоан”, “Санфречче Хиросима”, “Бурирам Юнайтед” каби клубларга қарши майдонга тушди. Кечаги ўйинда ҳам ушбу нохуш анъана давом этиб, “Бунёдкор” кутилмаганда Қатар клубига имкониятни бой бериб қўйди.

“Бунёдкор”нинг гуруҳдаги охирги ғалабаси 2012 йилнинг 16 майида қайд этилган. Ўшанда жамоа Жанубий Кореянинг “Поханг Стилерс” клубини 1:0 ҳисобида мағлуб этган. Қуйида “Бунёдкор”нинг ўз майдонидаги охирги учрашувларини келтириб ўтамиз.

16 май, 2012
“Бунёдкор” – “Поханг Стилерс” – 1:0

3 октябрь, 2012. “Бунёдкор” – “Аделаида Юнайтед” – 3:2

24 октябрь, 2012
“Бунёдкор” - “Ульсан Хюндай” – 1:3

13 март, 2013
“Бунёдкор” – “Поханг Стилерс” – 2:2

2 апрель, 2013
“Бунёдкор” – “Бейжинг Гоан” – 0:0

23 апрель, 2013
“Бунёдкор” – “Санфречче Хиросима” – 0:0

21 май, 2013
“Бунёдкор” – “Бурирам Юнайтед” – 0:0

11 март, 2014
“Бунёдкор” – “Ал Жаиш” – 1:2
 

Хайрулла Холиқов.