МЮ 62 миллион фунтга сотиб олган Матеус Куньянинг шартнома шартлари билан танишамиз

Уни қишдан бери таъқиб қилишарди: The Guardian нашрининг ёзишича, Рубен Аморим дарҳол Куньяни ўнлик роли учун асосий нишон сифатида белгилаган ва Матеусни ҳужумни ташкил этишда асосий шахс деб ҳисоблайди.

МЮ таркибни қайта қуришни Куньяни имзолашдан бошлади. Битим тафсилотлари:

- нархи - 62,5 миллион фунт. Куньянинг "Вулверхемптон" билан шартномасига кўра, бу сумма икки йил ичида уч қисмга бўлинган ҳолда тўланиши керак.

- шартнома 2030 йилгача тузилди, МЮда яна бир йилга узайтириш имконияти бор.

- The Telegraph нашри мухбири Жон Персининг ёзишича, Куньянинг маоши анчагина ўсади: у "Юнайтед"да ҳафтасига "Вулвз"да олганидек 120 минг фунт эмас 200 минг фунт олади. The Athletic’дан Лори Уитуэллда эса бошқа маълумот бор: февраль ойида Кунья "Вулверхемптон" билан ҳафтасига 150 минг фунтлик шартнома имзолаганди. Ҳар қандай ҳолатда ҳам Матеус фақат ютади.

Бразилиялик футболчига "Арсенал" ва "Ноттингем Форест" жиддий қизиқиш билдираётганди, бироқ Кунья Европа Лигаси финалидан олдинроқ "Юнайтед"га ўтишга рози бўлганди. Фабрицио Романо "Тоттенхем"га қарши ўйиндан бир неча кун олдин Матеус МЮ лойиҳасини маъқуллаганини маълум қилганди.

Кейинчалик BBC қўшимча қилди: Кунья "Юнайтед"нинг аввалги буюклигини тиклаш вазифасидан илҳомланган.

АПЛдаги мавқеи пастлиги ва кейинги мавсумда еврокубоклар йўқлигига қарамай, Кунья ҳамон "Юнайтед"ни буюк деб ҳисоблайди ва бу трансферни таваккал қадам сифатида қабул қилмайди.