Мурод Исмоилов: "Биринчи ўйин камчиликларимизни кўрсатиб берди"

"Аслида "Бунёдкор" билан баҳс режамизда йўқ эди. Машғулотларда йигитларнинг жисмоний ҳолатини яхшилаб 10 январдан бошлаб ўйинлар ўтказмоқчи эдик. Бироқ Тошкент клуби яқинда ОЧЛ плей-офф учрашувида майдонга тушиши боис уларга кўпроқ ўйин керак эди. Таклифга розилик бердик. Йилдаги биринчи ўртоқлик учрашувида табиийки ҳеч қайси футболчининг жисмоний ҳолати биз талаб қилганчалик бўлмайди. Бугун кўплаб хатолар кузатилди. Барча футболчиларга бир бўлимдан имкон бердим. Камчиликлар устида ишлашда давом этамиз.

Бугун Тоҳир Шамсиддинов, Алибобо Раҳматуллаев ва Азизхон Ибрагимов каби янги футболчилар тўп тепишди. Бундан ташқари иккинчи бўлимда ўйнаган ёшларимиз ҳам ўзларидан ёмон таассурот қолдиришмади.

Мавсум бошига қадар таркибга яна икки нафар ҳимоячини қўшиб олмоқчимиз. Ҳозирча музокара жараёни давом этмоқда", - дейди Мурод Исмоилов.