Мурод Алиев: "ЎФА "Бунёдкор"ни ҳимоя қилиши керак"

Бироз аввал ЎФА расмий сайтида "Тошкентнинг “Бунёдкор” клуби ФИФА талабига кўра 6 очкодан маҳрум қилинади" сарлавҳали хабар чиқди. Унда ёзилишича, ФИФА сентябрь ойида "Бунёдкор" футбол клубидан 6 очко олиб ташлаш борасида ЎФАга расмий мурожаат билан чиққан. Гап Сергей Симоненконинг маоши устида кетяпти. Украиналик ҳимоячи ҳалигача "Бунёдкор"дан пулини тўлиқ олмаган.

Бугун ЎФА Ижроқўми "Бунёдкор"дан 6 очко олиб ташлаш борасида ПФЛни расман огоҳлантирди. Энди ПФЛ бу қарорни амалда қўллаши керак бўлади. Хуллас, ушбу хабар матбуотда эълон қилингач, биз зудлик билан "Бунёдкор" ПФК бош директори Мурод Алиев билан боғландик.

"Бу анчадан бери давом этиб келаётган мавзу, - дейди Мурод Боқиевич. - Бизга клубдан очколар олиб ташланиши мумкинлиги анча олдин огоҳлантирилганди. Гап ҳамон Сергей Симоненконинг ойлик маошларини тўлиқ олмагани ҳақида кетяпти. Унинг пули тайёр, анчадан бери банкда турибди. Лекин ўзи ҳамон Тошкентга келиб пулини олиб кетгани йўқ. Биз футболчининг ўзига ҳам, унинг агентига ҳам бу ҳақда айтишга кўп марта уриндик. Қолаверса бу борада Украина элчихонасига ҳам мурожаат қилганмиз".

- "Энди ЎФА сайтида чиққан хабарга келсак, мен ҳам Ижроқўм аъзоси ҳисобланаман, аммо бу масала юзасидан Ижроқўм ҳали йиғилиш ўтказгани йўқ. Агар йиғилиш бўлганида мени ҳам чақирган бўлишарди. Менимча, Ижроқўм йиғилмасдан шундай қарорга келинган. Бу ўринда фақат шуни айтишим мумкин, ЎФА барча клублар қатори "Бунёдкор"ни ҳам ФИФА олдида ҳимоя қилиши керак. Чунки ФИФА учун қайсидир жамоадан олти очко олиб ташлаш ҳеч нарса эмас, лекин ЎФА халқаро майдонда Ўзбекистон клубларини ҳимоя қилиб, мана шундай қийин ҳолатларда ўзини кўрсатиши лозим бўлади".

Х.Холиқов.