Мундиал олдидан. Иброҳим Абдуллаев: "Германиядан кўра Гондурас хавфлироқ рақибдир"

Иброҳим Абдуллаев жамоамизнинг муваффақиятли иштирок этишига тўла ишонмоқда.

"Тайёргарлик аъло даражада кетмоқда. Барча футболчи жаҳон чемпионати учун максимал тайёрганлик кўрди. Ташкил етилган кўплаб йиғинларда жамоавий ўйинни йўлга қўйишга ҳаракат қилинди. Умуман йигитларни кайфияти ҳам, тайёргарлиги ҳам аъло. Муваффақиятли иштирок этишимизга ишонаман" , - дейди Иброҳим Абдуллаев.

- Иброҳим, агар мана шу таркибга эътибор қаратадиган бўлсак энг кўп футболчи ҳимоя чизиғи вакилларидир. Бу чизиқда рақобатни кўплигидан далолатми ?

Умуман ҳимояда балки бошқа чизиқларда ҳам энг кучли футболчилар йиғилган. Энг муносиблар жалб этилган деб ўйлайман. Ҳимоя чизиғида жароҳат ва четлаштиришлар кўп бўлади. Шу боис кўпроқ олинган бўлса керак.

- Ҳимоячи сифатида рақиб таркибидаги ҳужумчиларни қай даражада ўргандиларинг?

Биз ҳар куни рақибларни ўйинини кўриб бормоқдамиз. Менга Германиядан ҳам кўра Гондурас кучлироқ кўринмоқда. Ҳар икки жамоанинг ҳужумчиларини кузатиб бормоқдамиз ва керакли футболчилар ҳақида маълумотларга егамиз.

- Гуруҳдаги жамоалар ичида терма жамоамизни кейинги босқичга чиқиш имконияти қандай ?

Ўзбекистон ёшлар терма жамоасининг кейинги босқичга чиқиш имкониятини юқори баҳолайман.  Гондурасми? Германиями уддаласак бўлади. Бизни асосий мақсадимиз мана шу чемпионатда футболимизга янги натижа олиб келишдир. Ўтган жаҳон чемпионатларида қайд етилган натижани яхшиламоқчимиз. Камида ярим финални ўйнашни истаймиз.

- Жамоанинг етакчилари орасида ўйинни ўз қўлига олишига муносиб футболчиларимиз борми ?

Термадаги кўплаб футболчилар етакчилик қила олади. Уларнинг кўпчилиги аллақачон ОЧЛ, Ўзбекистон чемпионатида клубларининг асосий ўйинчиларига айланиб улгурган. Нафақат "Бунёдкор" балки "Насаф" ва "Пахтакор" клубининг футболчилари ҳам термада етакчиликни қўлига ола билади. Бу жамоада асосан етакчиларга емас жамоавий ўйинга эътибор қаратилади.

- Жаҳон чемпионатида нималарни кутмоқдасиз ?

Юртимиз шаънини муносиб ҳимоя қилиш биринчи мақсадимиз. Мухлисларга чиройли футбол кўрсатишни истаймиз ва юртимиз байроғини юқорига кўтариб келишни истаймиз.