МТЖ. Тошкентдаги охирги машғулотга Кападзе қўшилди

Кечки пайт машғулот одатдагидек соат 16:00да бошланди ва бир ярим соат давом этди. Янгилик шуки, бугундан машғулотга Темур Кападзе ҳам қўшилди. Биласиз, ярим ҳимоячи жорий мавсумни Қозоғистон чемпионатида ўтказди ва ҳозирда эркин агент ҳисобланади.

Терма жамоа машғулоти ҳар доимгидек чигалёзди машқлари билан бошланди, бунда Александр Волков футболчилар билан ишлади. Навбат тўп билан ишлашга келганда машғулотнинг асосий қисмини бош мураббий Миржалол Қосимов ҳамда ёрдамчилари Шуҳрат Мақсудов ва Бахтиёр Ашурматов ўтказишди.

Кечаги машғулотда бироз жароҳат олгани учун Егор Кримец бугун ҳам алоҳида шуғулланди. У асосан майдон бўйлаб югуриш орқали тикланиш машқини бажарди. Машғулотнинг иккинчи қисмида ўйинчилар икки жамоага бўлиниб футбол ўйнашди. Унда дарвозабонлар навбати билан дарвозаларни қўриқлашди.

Энди футболчиларга икки кун дам берилади ва 1 декабрь куни терма жамоамиз йиғинни давом эттириш мақсалида Дубайга учиб кетади. Дубайдаги илк йиғин 14 декабрга қадар давом этади.