Миржалол Қосимов: "Келинглар, пашшадан фил ясамайлик"

- Ўйин ҳақида

- Яхши ўйин бўлди. Ярим финални мақсад қилгандик ва бунга эришдик. Ўйин жанговор руҳда ўтди. Бу таклиф сифатида, майдон сифатини яхшилаш керак. Бу майдон футболнинг тезлигини йўқотади. "Андижон" бежизга Про-лигада биринчи ўринда эмас, жамоанинг кучи Суперлигада ўйнашга ҳам етади. Виктор Кумиковни биламан, мураббий сифатида қўлида таҳсил олганман. Жамоада бўйдор футболчилар йиғилган ва асосий урғу стандарт вазиятларга қаратилмоқда. Агар бугун Алишерни майдонга туширганимда Богдан Милич икки баробар катта бўларди. 

- Про-лига ва Суперлига ўртасидаги фарқни сездингизми?

- Фарқи сезилмади. Ўзи водийда ўйнаш осон эмас. Айтиб ўтдим, жамоа бежизга Про-лигада биринчи ўринда эмас. Кейинги ўйинларда омад тилайман. Агар майдон сифати тўғриланса, бу ерда ҳам мухлислар тезкор футбол кўришади.

- Жамоангиз ўйиннинг қайсидир қисмида саросимага тушгандек кўринди...

- Йўқ, нега бу саросима эмас. "Андижон" кўпроқ юқоридан йўлланган узатмаларга таяниб ўйнади. Ерлатиб ўйнашга майдон сифати жавоб бермасди. Бу футбол, кимдир ютади, яна кимдир эса ютқазади. Қўрқса, майдонга чиқиш керакмас.

- Санжар Турсуновнинг ножўя ҳаракатини қандай баҳолайсиз?

- У билан ҳаммаси нормал холатда. Келинглар, шу холатни нотўғри тасаввурга олиб бормайлик. Масалан, сизни сўкса нима дейсиз? У уят деди холос. Келинглар, пашшадан фил ясамайлик. Биз мухлислар учун ўйнаймиз. Агар ёмон иш бўлганида ўзим мухлислардан узр сўраган бўлардим.