"Металлург" бугун Туркияда Арманистоннинг амалдаги чемпиони билан ўйнайди

Рақиб Арманистон чемпионатининг пешқадами – Ереваннинг “Алашкерт” жамоаси бўлади.

“Алашкерт” футбол клуби 1990 йилда ташкил этилган, Арманистон миллий чемпионатининг илк мавсумида қатнашган. 2000 йилга келиб жамоа тарқатиб юборилганди. 2011 йилда клуб мутасаддилари жамоани қайтадан ташкил этишга муваффақ бўлишди. Жамоа 2015 йилдан буён кетма кет уч марта мамлакат чемпиони деган шарафли номга сазовор бўлди. 2016, 2018 йилларда мамлакат Суперкубогини қўлга киритди. Айни пайтдаАрманистон чемпионатида “Алашкерт” 17 учрашувнинг 10 тасида ғалаба қозониб, 3 тасида дуранг ўйнаган, 4 та учрашувда имкониятни бой берган ва 33 очко жамғарган ҳолда биринчи ўринда бораяпти. Голлар нисбати – 20:10. “Алашкерт” иккинчи ўринда бораётган “Бананц”ни 4, “Пюник”ни эса 6 очкога ортда қолдирмоқда. Арманистон чемпионатининг баҳорги қисми 3 март санасидан давом этирилади.

Бекободликларнинг Туркия сафаридаги бошқа рақибларининг ҳам номи маълум бўлди. Андрей Шипилов жамоаси 2 февраль санасида Болгариянинг ЦСКА 1948 ФК билан куч синашса, 5 февраль куни Қозоғистоннинг “Акжайик” жамоасига қарши майдонга тушади. Бекободликларнинг Туркия сафаридаги охирги учрашуви 8 февраль санасига режалаштирилган бўлиб, рақиб Россиянинг “Ленинградец” жамоасидир.