Лионель Мессига Марадона ва Пеле ҳайкали ёнида турадиган ҳайкал совға қилинди

КОНМЕБОЛ жаҳон чемпиони ва кўплаб "Олтин тўп"лар соҳиби Лионель Месси шарафига янги ҳайкал ясатди. Шу тариқа, унинг номи Жанубий Америка футболида Диего Марадона ва Пелелар қаторида абадийлаштирилди. Қатардаги мундиалда терма жамоасини чемпионлик сари етаклаган ҳужумчига сўнгги 12 ой давомида қўлга киритган икки кубоги – Жаҳон чемпионати ва Финалиссима бош соврини репликалари топширилди.

35 ёшли футболчи яқинда ўзининг 800-голини урди. Унинг Аргентина учун киритган тўплари сони 99 тани ташкил этади. Сешанба куни бўлиб ўтадиган ўйинда Лео 100-голини уриши мумкин.

ПСЖ ҳужумчиси унинг ютуқлари яна бир бор эслангани борасида фикрларини билдирди: 

"Менинг орзум профессионал футболчига айланиш ва ҳаётимда завқланадиган ишимни қилиш эди. Мен жуда узоқ йўлни босиб ўтдим. Мен ҳар доим олдинга қараб юрдим ва ғалаба қозонишни хоҳладим. Ўйлашимча, энг муҳими, ўз орзуларингиз учун курашиш. Чунки ҳамма нарсанинг иложи бор".