Жаҳонгир Жиямуродов: "Асосий эътиборни инфратузилмани яхшилашга қаратганмиз "

Кескин курашларга бой ўтган учрашувда "Зомин" кутилмаганда "Шўртан"ни 3:1 ҳисобида таслим қилди. Ўйиндан кейин жамоа бош мураббийи Жаҳонгир Жиямуродов фикрларини билдириб ўтди.

"Ўйин осон ўтмаслигини билгандик. Рақибимиз яхши шаклланган, Суперлига ҳавосидан нафас олган жамоалардан бири эди. "Шўртан" жамоасидан етишиб чиқаётган ёш футболчиларнинг келажаги бор дея оламан. Шуларни ҳисобга олиб шогирдларимга керакли кўрсатмаларни бердим. Улар буни эплай олишди. Қўлларидан келганча ғалаба учун ҳаракат қилишди. Тўғрисини айтаман иккинчи бўлимда ўзимда ҳам ҳаяжон бўлди. Чунки, рақиб ўнта футболчи билан ҳаракат қилган бўлсада, ҳавфли ҳужумлар уюштирди. 

Машғулотларда барча жиҳатлар устида ишладик. Лекин, кўпроқ комбинацион ҳужумларни ташкил қилиш борасида иш олиб бордик. Ярим ҳимоячиларга рақиб дарвозабонини таҳликада ушлаб туриш учун кўпроқ узоқдан зарабалар бериш кераклигини айтдим. 

Жамоада молиявий ҳолат жуда ҳам зўр дея олмайман. Бироқ, ёмон ҳам эмас. Тўғриси, бизда бу қадар катта маблағ йўқ. Раҳбарларимиз доим ҳаракатда. Стадион қуриб битказилди. Яқин орада базамиз ҳам фойдаланишга топширилади. Ҳозирда бор эътиборни инфратузилмани яхшилашга қаратганмиз",- дейди Жаҳонгир Жиямуродов.