Илҳом Мўминжонов: "Пахтакор" ва "Бунёдкор"дан икки нафар ёш футболчини кузатаяпмиз"

Ўйин ҳақида

Бугунги ўйинга шогирдларимиз билан астойдил тайёргарлик кўрдик. "Истиқлол" сафида бир қатор иқтидорли футболчилар ўйнайди. Шу сабаб рақибни жиддий ўрганиб чиқдик. Биринчи бўлимнинг 25-дақиқасига қадар юқори прессинг эвазига иккита гол киритдик. Жамоамиз ўйини биринчи бўлим охирларига келиб бир оз сустлашди. Шундан келиб чиқиб рақибимиз тўпни кўпроқ назорат қила бошлади. 

Иккинчи бўлимда яна ўз ўйинимизни намойиш этишни бошладик. Хавфли вазиятлар, рақиб дарвозасига тўп киритиш учун имкониятларимиз юзага келди. Гарчи иккинчи бўлимда гол киритмаган бўлсак ҳам биринчи бўлимда рақиб дарвозасига киритилган иккита тўп бизга якунда ғалаба келтирди. Мазкур ғалаба билан "Нефтчи" клуби раҳбарияти, футболчилар ҳамда жамоамиз мухлисларини табриклайман.

- Абдул Азиз Юсупов ва Отабек Зокировларнинг майдонга тушмаётганликлари сабаби нима?

- Клубда жами 25 нафар футболчи рўйхатдан ўтган. Ўйлашимча, барча футболчилар бир хил савияга эга. Ҳозир биз жисмонан ва руҳан тайёр футболчиларни майдонга тушираяпмиз. Ҳали чемпионат учрашувлари олдинда, Зокиров ва Юсуповлар ҳам албатта бизга ёрдам беришади. Бугун Шерзод Каримов бир оз бетоб эди, у ҳам навбатдаги учрашувларда бизга ёрдам беришига ишонамиз.

- Сўнги икки тур мобайнида жамоангиз тезкор гол киритишнинг уддасидан чиқди. Сиз томондан берилган кўрсатма шундай эдими?

- Биринчи турда "Олимпик" жамоасига қарши ўйинда ҳам ўзларинг гувоҳ бўлдинглар, биринчи бўлимда вазиятлардан фойдалана олмадик. Ўша ўйинда 30-минутдаёқ 3:0 ҳисобга эришсак бўларди. Биз машғулотларда юқори прессинглар устида ишлаяпмиз. Тўп рақибга ўтганида прессинг эвазига қайтариб олишни мақсад қилганмиз. Бу машғулотларда тайёрланган услуб. Бугунги ўйинда ҳам 70-80 дақиқаларда яна гол киритсак бўларди. Футболчиларимиз жисмонан кучли, чарчаб қолишмаяпти. Афсус бугун легионер ҳужумчимиз Марко Обрадович гол кирита олмади. Бугунги ўйинда 6:0 ёки 7:0 ютсак ҳам бўларди. 

- Ҳозирги таркиб билан Суперлигага чиқишга ишонасизми? Ёки давралар оралиғида таркибни янада кучайтириш мақсади борми?

- Биз ушбу футболчилар билан Суперлигага чиқишни мақсад қилганмиз. Ҳали вақт кўрсатади. Ҳозирча ушбу футболчиларнинг ўйинларидан қониқаяпмиз. Ёрдамчи мураббийларимиз "Пахтакор" ва "Бунёдкор"дан икки нафар ёш футболчиларни кузатишмоқда, балки уларни таркибга жалб этармиз.