Ҳамиджон Актамов: "Мухлисларимизга қувонч улашганимиздан хурсандмиз"

— Чемпионат жадвалида ёнма-ён бораётган жамоалар учрашуви доимо кескин ва муросасиз кечган, — деди Ҳамиджон Ғуломович. — "Навбаҳор" ҳар жиҳатдан ўз таркибига тажрибали ва маҳоратли футболчиларни жамлаган жамоалардан саналади. Учрашув олдидан наманганликлар иштирокида ўтган бир неча ўйинларни ўрганиб, таҳлил қилдик. Навоийдаги ўйин осон ўтмаслигини аввалдан билардик.  

— Гарчи, учрашувда тезкор гол киритган бўлсак-да, рақибимизнинг қисқа фурсатда мувозанатни тенглаштиргани жамоамиз аъзоларини ҳушёрликка ундади. Голга тортадиган кўплаб имкониятлар юзага келмоқда. Афсуски, йигитлар барчасидан унумли фойдалана олишяпти, дея олмайман. Шунга қарамай, ҳужумчимиз Баҳриддин Ваҳобовнинг майдонда ишончли ўйин намойиш этаётганлиги барчамизни хурсанд қилмоқда.

— Эътиборлиси, бу йилги мавсумда бир ғалаба жамоани чемпионат жадвалида мавқеини яхшиласа, аксинча мағлубият қуйи поғонага яқинлаштириб қўйиши ҳеч гап эмас. Бугун фақат ғалаба иштиёқида майдонга тушгандик. Мақсадимизга эришганимиздан, мухлисларимизга қувонч улашганимиздан хурсандмиз. Олдинда янада муҳим учрашувлар кутиб турибди. Унда рақибимиз қайси жамоа бўлишидан қатъий назар фақат муваффақият қозониш учун майдонга чиқамиз.