Ҳаким Фузайлов: "Шундай юқори талаблар орқали ўзбек футболи тартибланиб боради"

"Ўйин қийин кечишини тахмин қилгандик. "Динамо" жорий ўз олдига катта мақсад қўйган ва ушбу мақсадларга эришиш учун ҳаракат қилмоқда. Анча ёрқин жамоа шаклланган. Биз ҳам шундай. Биз ҳам ёмон ўйнамаяпмиз. Мен билишимча, қайтган тўпга эгалик қилиш бўйича "Динамо" Суперлигада етакчи жамоа. Айнан шу жабҳада биз рақибга ютқазиб қўйдик. Яна голлар уришимиз мумкин эди. Ҳаёт давом этади. Футболчилар бироз ранжишди. Энди кейинги учрашувга эътибор қаратишимиз керак. Хафа бўлиб ўтиришга вақт йўқ", - деди Ҳаким Фузайлов бугунги баҳс якунлангач.

- "Хоразм" таркибида кўп футболчилар ўтган мавсумларда "Динамо" таркибида тўп тепган эди. Ушбу футболчилар бугунги ўйинга қўшимча иштиёқ билан майдонга тушдими?

- Очиғини айтсам, биз янги жамоа туздик. "Хоразм" эса 15 йил деганда энди энг юқори дивизионга қайтди. Футболчиларга мотивация бериб ўтириш керак эмас. Биз ушбу таркибни январь ойида йиғдик. Биз учун ҳар бир ўйин финалдек. Иштиёқ юқори бўлиши кераклиги табиий.

- "Хоразм" қачон уй учрашувларини ўз стадионида ўтказа бошлайди?

- Яқин орада. "Андижон"га қарши яқинлашиб келаётган ўйинни ҳам Жиззахда ўтказсак керак. Бизда майдон аллақачон тайёр, ёритиш тизими ҳам. VAR техникалари ҳам етиб келди. Фақатгина текширувдан ўтишимиз керак. Балки "Навбаҳор"га қарши 2 июльдаги ўйинни ўз уйимизда ўтказармиз.

- ПФЛнинг бундай талаблари жуда қаттиқ эмасми? Масалан, "Сурхон" узоқ вақт давомида Тошкентда ўйнади. Ўтган йили эса "Қизилқум"...

- Аксинча, бу яхши. Масалан, терма жамоамиз илк маротаба мундиалга чиқди. Шундай юқори талаблар орқали ўзбек футболи тартибланиб боради.