"Гулистон" Биринчи лигада иштирок этади

"Ҳозирда жамоамиз янги мавсумга тайёргарликни режадагидек давом эттирмоқда. Ўтган ҳафтада "Сўғдиёна"га қарши назорат учрашувида майдонга тушди. Тайёргарлик режасидан яна бир нечта назорат ўйинлари ўрин олган. Бу ҳақда албатта расмий каналда хабар берамиз. 

Катта мақсад ва вазифалар билан янги мавсумга пухта ҳозирланаётган жамоамиз 2027 йилда Про лигада иштирок этиш учун потенциал номзодлардан бири ҳисобланади. Профессионаллик сари ҳаракат қилаётган "Гулистон" футбол клуби таркибни кучайтириш, маҳаллий иқтидорли ўйинчиларни жамоага жалб қилиш йўлида босқичма-босқич ҳаракат қиляпти. Селекция ишлари давом этмоқда. Тез орада клуб сафига қўшиб олинган янги ўйинчилар ҳақида батафсил маълумотлар берамиз.

Айни вақтда Гулистон шаҳридаги "Марказий" стадионида таъмирлаш ишлари давом этмоқда. Шу боис жамоамиз янги мавсумни Янгиер шаҳрида ўтказади. Клуб ҳозирда айнан шу ерда машғулотларни кунига икки маҳалдан олиб бормоқда. Мавсум стартига қадар клуб таркибни сезирарли ва сифатли ўйинчилар ҳисобига кучайтиради ҳамда ўз мақсадлари сари дадил қадам ташлашга ҳозирланмоқда", – дейилади клуб хабарида.

Аввалроқ "Гулистон" қайта тиклангани ва жамоа олдига юқори мақсадлар қўйилгани маълум қилинган эди.