Гарет Бэйл: “Келаси мавсум Мадридда қоламан”

“The Sun” нашрига берган интервьюсида у ўтган мавсум якунлари ва бошқа ҳолатлар борасида саволларга жавоб қайтарди.

- Премьер-лигага қайтишингиз ҳақида гап-сўзлар юрибди.
- Мадридда кейинги мавсум ҳам ўйнайман. Биз Чемпионлар лигасида финалга чиқа олмаганимиздан афсусдамиз. Кейинги йил яна уни ютишга ҳаракат қиламиз. Барча совринларга эга чиқиш учун 100 фоиз кучимизни ишга соламиз. Умид қиламанки, биз муваффақиятларга эришамиз.

- “Бернабеу”даги танқидларга қандай муносабатдасиз?
- Нималарга қодирлигимни тушунаман ва қачон яхши ишлашимни биламан. Ўз савиямдан паст ўйнаганимда уни тузатиш учун барча масъулиятни зиммамга оламан. “Реал”да ўйнаётганда ҳамиша янги нарсаларни ўрганиб бориш лозим. Ҳалигача катта клубга ўйнашга кўникиб боряпман. Яхши ва ёмон лаҳзалар мен учун катта тажриба бўлди. Мавсумнинг кўп қисмида яхши ўйнадик, бироқ Рождестводан кейин қийин даврни бошдан кечирдик.



- Ушбу мавсумда нима рўй берди?
- Мавсумни яхши ўтказдик, аъло эмас. Европа Суперкубоги ва клублар ўртасидаги жаҳон чемпионатида зафар қучдик. Бироқ бу ерда ҳамиша Ла лига ва Чемпионлар лигасида зафар қучишингга умид қилишади. Энг муҳими, биз охиригача курашдик ва таслим бўлмадик. Бироқ баъзан ютқазишга ҳам тўғри келади.

- Сизга нима етишмади?
- Мен мавсумдан роҳатландим ва умуман олганда яхши ўйнадим. Балки, кўп гол урмагандирман, лекин шунинг устида ишлайман ва кўпроқ гол уришга интиламан. Мавсум якунланди ва ҳужумларни якунлаш устида ишлашим керак. Одатда бу менда яхши кўриниш олади, бироқ бу мавсумда қатор муҳим вазиятларда тўп кирита олмадим. Ўша ҳолатларда гол уришим шарт эди. Яхши ва ёмон мавсум ўртасидаги фарқ айнан шунда. Камчиликни тузатиш устида ишлайман ва умид қиламанки, келажакда мен улардан фойдаланиб, кундан-кунга яхшироқ ўйнаётганимни ҳис қиламан.



- “Реал”га ўтиб тўғри қилганмисиз?
- Бу ерга бошқача ўйин услубини тушуниш ва янги нарсаларни ўрганиш учун ўтганман. Ҳозиргача ўрганмоқдаман. Фаолиятимдаги энг яхши йиллар олдинда ва жароҳатлар мени четлаб ўтишига умид қиламан. Келажакка умид билан боқаман. Кўрамиз, нималарга қодир эканман.

- Кумирингиз Гиггз сингари Чемпионлар лигасини 2 марта ютиш орзуингизми?
- Албатта. Исталган футболчидан сўранг ва у сизга имкон борича кўпроқ кубокларни ютишни исташини айтади. Нима учун олдимга юқори мақсадни қўймайман? Айнан шу сабабли “Реал”га келганман – совринларни ютиш. Чемпионлар лигасидан муҳимроқ нарса йўқ. “Бернабеу”даги муҳит Чемпионлар лигаси ўйинларида ажойи даражада. Мухлислар бизни ўйин давомида қўллаб туришади. Ҳар бир тегиниш ва голли вазиятда улар шовқин ҳосил қилишади.



- Энг ёрқин хотира “Десима” билан боғлиқми?
- Клуб мени “Десима”ни ютиш учун қўшиб олди ва орзум биринчи мавсумдаёқ амалга ошди. Мен Чемпионлар лигаси ғолиби бўлганимни айтишим мумкин.


Беҳзод НАЗАРОВ тайёрлади.