Февзи Давлетов: "ОКМК билан баҳсда кўп куч ва эмоция йўқотдик, бу ўйинга кучли руҳлана олмадик"

- Ўйин ҳақида фикрингиз?

- Қисқача гапирадиган бўлсам, ўйин назорати тўлиқ биз томонда бўлди. Рақиб асосий урғуни ҳимояга қаратди. Ўтган тур ОКМК билан баҳсда кўп куч йўқотгандик, бугун бизга бор кучни бериб ўйнаш етишмади. Бунга иссиқ об-ҳаво ҳам ўз таъсирини кўрсатди. Одатда бундай ўйинларда бир ё иккита имконият бўлади ва шундан фойдаланиш керак. Барибир нима қилиб бўлса-да, гол уришимиз керак эди, афсуски тўп кирита олмадик.

- "Сурхон" бугун ютуққа ҳаракат қилди, лекин гол уриш учун нима сабабдан иккинчи ҳужумчи майдонга туширилмади?

- Чунки ҳозир бизда иккинчи ҳужумчи йўқ. Ўйинчимиз бор, лекин формада эмас. Балки иккинчи даврада ҳаммаси ўз ишига тушар. Ёки ёзги танаффусда бошқа ҳужумчи қидиришга тўғри келади.

- "Сурхон" гранд жамоалар билан яхши ўйнаяпти, бироқ ўртамиёна клубларга келганда қийналади. Нега шундай бўляпти?

- Футбол эмоцияларга бой ўйин. Кучли жамоаларга қарши футболчилар ўзларини яхши тайёрлайди. Кайфият ҳам юқори бўлади. Лекин нима учундир ўртамиёна жамоалар билан шу нарса кўринмаяпти. Биз мураббийлар штаби муаммо нимада эканини биламиз ва буни йўқотиш устида иш олиб боряпмиз.

- Рақиб жамоа ҳимояга асосий урғуни берган пайтда "Сурхон" ёритиб ўтишга қийналяпти ва қанотлардан тўп узатиш билан чекланиб қоляпти.

- Бу ўринда кўп нарса футболчиларнинг маҳоратига боғлиқ. Айниқса ўрта чизиқ вакилларидан катта куч талаб қилади. Мураббий фақат керакли гапни айтиши мумкин, лекин рақиб ўйинчисини алдаб ўтиш футболчи вазифаси ҳисобланади. Жарима майдончаси ичида қандай ҳаракат қилиш ҳам футболчиларнинг ўзига боғлиқ.