Фарғона вилояти биринчилиги. Кечаги учрашувлардан сўнг мураббийлар фикрлари

Сардор Зокиров, "Цементчи" бош мураббийи: "Футбол бўйича Фарғона вилояти биринчилиги 2-лига мусобақаларида жорий мавсумда жами 16 та жамоа иштирок этиб келмоқда. Булардан 9 та жамоа Фарғона худуди, 7 та жамоа Қўқон худудига ажратилган холда ташкил этилмоқда.

"Цементчи" жамоамиз Фарғона худудига ажратилган холда мусобақаларда иштирок этмоқда. Мазкур чемпионатда футбол учрашувлари жуда қизғин руҳда ташкил этилмоқда. Биласизми, мусобақалар давомида кутилмаган натижалар ҳам кузатилмоқда. Масалан ҳеч кутилмаганда ёшлар жамоаси вакиллари катталар жамоасини мағлуб этиб қўймоқда. Умумий маънода айтадиган бўлсак, ҳар йилгига қараганда бу йилги мусобақалар жуда қизиқарли тарзда ўтмоқда.

Вилоят футбол Ассоциацияси раҳбари Носир Отақўзиев бошчилигида бу йилги мусобақалар жуда яхши ташкил этилмоқда деб айта оламан. Насиб бўлса бундан ҳам яхшироқ натижаларга эришишга ҳаракат қиламиз.

"Цементчи" жамоасининг жорий мавсумдаги мақсади вилоят биринчилигида ғолиб чиқиш ҳамда пулька ўйинларида муваффақиятли қатнашишдан иборат.Жамоамизни ушбу мавсум якунида Биринчи лига йўлланмасига эга чиқишига умид қилиб қоламиз.

Фурқат Қўчқоров, "Ёзёвон-Лочинлари" клуби бош мураббийи: " Бу йилги вилоят биринчилигида муносиб иштирок этишга ҳаракат қилмоқдамиз. Мусобақаларни ташкиллашда беминнат ёрдам кўрсатиб келаётган Фарғона вилояти футбол Ассоциацияга клубимиз номидан миннатдорчилик билдирамиз. Мусобақалар жуда кўтаринки руҳда ўтказиб келинмоқда.

"Ёзёвон-Лочинлари" клубининг жорий мавсумдаги мақсади вилоят биринчилигида ғолибликни қўлга киритган холда пулька ўйинларида муносиб иштирок этишдан иборат. Клубимиз раҳбарлари томонидан бу борада бизга барча шароитлар яратиб берилмоқда.

Бекзод Толибов ёзиб олди