Элдор Шомуродов: "Ўйинлар Саудия Арабистонида ўтиши бизга қийинчилик туғдирмайди"

- Терма жамоа ихтиёрига келдингиз. Италияга қайтгач 14 кун карантинда ўтириш мажбурий эмасми?
- Йўқ, Италияга қайтганимдан кейин карантинда ўтиришим шарт эмас, шунчаки коронавирус учун тест топширамиз ва бемалол клуб ихтиёрига қўшиламан. Насиб қилса турмуш ўртоғим ва фарзандимни Италияга олиб кетаман.

- Олдинда турган ўйинлар ҳақида нима дея оласиз?
- Гана ва Ироқ билан ўйинларга тайёргарлик олиб бораяпмиз. Хабарингиз бор, ёзда ЖЧ саралаши доирасидаги учта муҳим учрашув бор. Шу ўйинларга муносиб тайёргарлик кўриш учун, жамоа ўйиннини шакллантириш учун ўртоқлик баҳслари жуда ҳам керак.

- Бизнинг гуруҳ ўйинларининг марказлашган ҳолда Саудия Арабистонида ўтишига қандай қарайсиз?
- Ёзда бу давлатда қанчалик иссиқ бўлишини барча билади. ОФКнинг муносабати жуда ҳам тўғри деб ҳисобламайман. Лекин барча бир хил шароитда ўйнайди ва бизга бунинг ҳеч қандай қийинчилиги йўқ. Худо хоҳласа мухлисларни хурсанд қилиш учун барчасини қиламиз.