ЕЧЛ: Бугун кўришингиз шарт бўлган ўйин ҳақида

Бугун 5та учрашув ва эртага ҳам 5 ўйин ўтказилади.

Шу йўл билан Европа чемпионлар лигасига йўлланма оладиган яна 10та жамоа номини билиб оламиз.

Одатда ЕЧЛ саралаш босқичини кўпчилик ҳам катта қизиқиш билан кузатмайди. Аммо сўнгги босқичда баъзи кучлилар ишга киришаётганда кўпчиликнинг назари барибир ЕЧЛ томон тушади.

Масалан бу сафар "Ливерпуль" ишқибозларининг диққат-эътиборлари ЕЧЛнинг сўнгги саралаш босқичига қаратилиши шубҳасиз.

Жамоа жорий мавсумда ЕЧЛда ўйнаши ёки Европа лигаси билан чекланиб қолиши айнан шу ўйинга боғлиқ бўлади.

Шунингдек, кўпчилик учун қизиқ бўлган "Наполи" жамоаси ҳам ЕЧЛ гуруҳ босқичига йўлланма олиш пайида бугун ишга киришади.

Энг қизиғи, уларнинг рақиблари ҳам анойилардан эмас.

"Ливерпуль"ни Германияда ўтган йили шовқин кўтарган Юлиан Нагельсманннинг "Хоффенхайм" жамоаси бўлса, "Наполи" Балотелли тўп сураётган "Ницца" билан Европанинг энг нуфузли турнирида иштирок этиш учун курашади.

ЕЧЛ саралаш босқичидаги энг кўзга кўринган ва эътиборда бўладиган иккита тўқнашув айнан шулар.

Шу боисдан ҳам бугун ва эртага тунда футбол шайдолари уйқудан воз кечишларига тўғри келади.

"Ливерпуль" айни пайтда ўз етакчиси Коутиньони сотиш арафасида турибди ва бугун бразилиялик футболчи жамоасига ёрдам бера олмайди. Футболчи учрашув қайдномасига ҳам киритилмаган ва жамоа билан Германияга бормаган. Демак Клопп янги мавсумда Коутиньосиз ўйнаш учун чинакамига тараддуд кўраверса бўлади.

Лекин ҳозирда Клоппнинг эътибори бунда эмас, Коутиньодан ҳам муҳимроқ бўлган ўйин бўсағасида турган мерсисайдликларни жуда жиддий чорлов кутмоқда.

"Ливерпуль"нинг рақиби "Хоффенхайм" ўтган йили Германия Бундеслигасида тўртинчи ўринни қўлга киритган ва ЕЧЛ йўлланмаси учун бўлган курашда бир қатор номдор жамоаларни ортда қолдиришни уддалаганди.

30 ёшли Юлиан Нагельсманн барпо этаётган жамоа тобора барчанинг тилига тушмоқда.

Бундеслигада ўз хунарлари билан танилган Нагельсманн энди европа ареналарида ҳам ўзининг мураббийлик салоҳиятини кўрсатишни мақсад қилган.

Камтар мураббий ўзига ўхшаган камтарин жамоа билан юқори мақсадлар сари интилишда давом этмоқчи.

"Ливерпуль" мураббийи Юрген Клопп каби ҳаммасини бошидан бошлаётган Нагельсманннинг биринчи юришиёқ анча шов-шувли чиқмоқда. Биласиз, Клопп Дортмунддан олдин "Майнц"даги ишлари билан кўпчиликнинг меҳрини қозонганди ва Дортмундда у чинакамига топ мураббийлар рўйхатидан ўрин олганди.

Юлиан Нагельсманннинг келажагини кўпчилик Мюнхенда кўрмоқда. Карло Анчелоттидан кейин "Бавария" рулига келиши кутилаётган ушбу мутахассис ўзининг нималарга қодир эканлигини яна бир бор катта масштабда кўрсатиши лозим.

Агарда ушбу ишни уддалай олса, Юлиан Нагельсманннинг хизматларига нафақат "Бавария", балки кўплаб европа грандлари маҳлиё бўлиб қолишлари тайин.

Аммо Юрген Клопп бунга шунчаки қараб ўтирмоқчи эмас. Клопп "Ливерпуль" мухлислари истаётган ва соғиниб қолган Европа чемпионлар лигасига жамоасини олиб чиқмоқчи.

Нафақат "Ливерпуль" ёки унинг мухлислари, балки Юрген Клоппнинг ўзи ҳам ЕЧЛ ҳавосидан нафас олишни қумсаган.

"Хоффенхайм" эса ўз тарихида илк бор ЕЧЛда ўйнаш имконияти туғилганидан хурсанд ва улар ушбу имкониятдан максимум фойдаланишмоқчи.

Ким ЕЧЛ йўлланмасини қўлга киритиши ҳозирча номаълум. Аниғи шуки, бизни иккита муросасиз ва қизиқарли ўтиши кафолатланаётган учрашув кутмоқда.

Германияда ҳам, келаси ҳафтада эса Англияда ҳам жамоалар мухлисларни тўлқинлантириб юборадиган, шиддаткор футбол намойиш этишади.

Чунки "Хоффенхайм" ҳамда "Ливерпуль" ҳужумкор ва жуда қувноқ футбол ўйнашни хуш кўришади.

Ҳимоядаги ўйинлари билан мақтана олмайдиган ушбу жамоаларнинг асосий қуроллари ҳужумкорликда.

"Ливерпуль" ва "Хоффенхайм" жуда кўп гол ўтказиб юбориши мумкин, лекин уларнинг асосий кучи ўша ўтказиб юборилган голлардан ҳам кўпроқ голлар уришни эплашларида.

Бу сафар қайси жамоа бу вазифани эпларкин? Айна ша савол кўпчиликни қизиқтирмоқда.

"Ливерпуль" Коутиньосиз қолган бўлса, "Хоффенхайм" ўзининг икки етакчиси - Зюле ва Рудини "Бавария"га бериб юборди.

"Ливерпуль"нинг ёздаги энг қайноқ трансфери - Салах бўлди.

"Хоффенхайм"да эса Гнабри асосий харид сифатида қайд этилмоқда.

Иккала жамоа ҳам тезкор ва ҳужумкор футбол намойиш этишади.

Янги харид қилинган футболчилар айнан шу фалсафага тўғри келгани учун ҳам сотиб олинган.

Иккита немис мутахассисининг ўзаро тўқнашуви ҳам бугунги ўйин афишасига ўзига хос жозиба қўшмоқда.

Клопп айни пайтда германиялик энг ёрқин мутахассислардан бири бўлса, Нагельсманнга келажак сифатида қаралмоқда.

"Ливерпуль" ва Клопп "Хоффенхайм" ҳамда Нагельсманнга қараганда анча тажрибали.

Тажриба ҳамда малакага қарши юксак шижоат ва кучли иштиёқ.

Бу тўқнашувда тажриба устун келадими ёки шижоат?

Кўрамиз...

Европа чемпионлар лигаси.

Саралаш босқичи.

15 август, сешанба.

"Қорабоғ" (Озарбойжон) - "Копенганген" (Дания)

АПОЕЛ (Кипр) - "Славиа Прага" (Чехия)

"Янг Бойз" (Швейцария) - ЦСКА (Россия)

"Хоффенхайм" (Германия) - "Ливерпуль" (Англия)

"Спортинг" (Португалия) - ФКСБ (Руминия)

16 август, чоршанба.

"Селтик" (Шотландия) - "Астана" (Қозоғистон)

"Наполи" (Италия) - "Ницца" (Франция)

"Хапоел" БШ (Исроил) - "Марибор" (Словения)

"Истанбул" (Туркия) - "Севилья" (Испания)

"Олимпиакос" (Греция) - "Риека" (Хорватия)

Жавоб ўйинлари: 22-23 август