Даврон Файзиев: "Ҳозир ғалабадан шодланиб ўтирадиган вақт эмас"

Авваламбор, бутун Ўзбекистон аҳлини, барча футбол мухлисларини Қурбон ҳайит байрами билан табриклайман. Футбол мухлислар учун ўйналади, мана шундай байрам кунларида футбол ўйнаганлигимиздан ранжиганимиз йўқ, сабаби юқорида айтдим, мухлислар келиб, учрашувни кузатиб, ҳордиқ чиқариб кетиши қайсидир маънода бизни хурсанд қилади. Бугунги ўйин мухлисларга манзур бўлди деб ўйлайман, чунки бутун учрашув давомида гоҳ “Истиқлол”, гоҳ “Динамо” ҳужум қилди. Ҳар икки жамоа ҳам бугун фақат ва фақат ғалаба учун майдонда борини бериб ҳаракат қилди. Агар биринчи бўлимда бизда юзага келган имкониятлардан фойдаланганимизда, биз учун бу учрашув анча осон ўтган бўларди. Иккинчи бўлимда эса “Истиқлол” жамоасида икки марта жуда қулай имконият юзага келди, фойдалана олишмади, омад бизга кулиб боқди, футболда омаднинг ўрни жуда муҳим аҳамият касб этади. Киритилган голда рақиб дарвозабонини айблаш нотўғри, футболда ҳамма ҳам хато қилади.

Биз ўз олдимизга қўйилган вазифа сари интилаяпмиз, ҳаракат қилаяпмиз. Жамоани дастлаб қабул қилиб олганимда ҳам айтганманман, Суперлигага чиқиш учун назарий жиҳатдан имкониятимиз борми, охиригача курашамиз. Ҳали олдинда 13 та тур бор, бугунги ўйинни унутиб, кейинги учрашувга янада жиддийроқ тайёрланишимиз керак, айни дамда Про-Лигада тиғиз тақвим юзага келган, ғалабадан шодланиб ўтирадиган вақт эмас, дарҳол кейинги учрашув ҳақида ўйлаш, бош қотириш керак. Қизиқарли учрашувлар ҳали олдинда, самарқандлик мухлисларга бугунги учрашувда ғалаба қозониб, ҳайит байрамига совға қилдик. Барчамизга яна бир бор Қурбон ҳайит айёми муборак бўлсин!        

Бекзод Толибов ёзиб олди.