UZ

Сўнгги янгиликлар

15:41"Ницца" АПЛ клублари қизиқаётган ҳимоячиси учун нарх белгилади  0 15:30Про лига. "Олимпик-MobiUz" – "Машъал" 0:0 (онлайн ҳисоб)  1 15:10ПСЖнинг 2 нафар футболчиси сафга қайтди  0 14:08Шенсни "Юве"да қолиши учун маоши камайишига рози бўлиши керак  0 13:40Гризманн қайтди  1 13:21Дилмурод Назаров хотирасига бағишланган "Наврўз Кубоги-2024" мусобақаси қандай ўтди?  3 13:09"Бавария" "Штутгарт" вингерига кўз тикди  0 12:46"Манчестер Юнайтед" Каземирога ўринбосар топди  2 12:20Эшитдик-да! ФИФА "Бунёдкор"га илк санкцияни қўллади  21 11:48Клоппнинг ассистенти "Аякс" бош мураббийига айланиши мумкин  1 11:24Ўзбекистон – Гонконг учрашувида майдонга югуриб тушган мухлислар маъмурий жавобгарликка тортилди, 2 нафар шахс 5 суткага қамалди  22 10:57Пеп Гвардиола «Манчестер Сити»даги келажаги борасида бир қарорга келди  7 10:28«Бавария» Алонсони қўлга кирита олмаганидан сўнг бошқа бир топ мураббий билан шартнома тузмоқчи  1 10:00ЦСКА устози РПЛнинг энг кучли футболчиси кимлигини айтди  8 09:3410 ойга четлатилган Тонали яна узоқ муддатга дисквалификация қилиниши мумкин  3

Чемпион "Ювентус" vs "қайта тирилаётган" "Милан" Янгиликлар

Чемпион "Ювентус" vs "қайта тирилаётган" "Милан"

Янги мавсумда Скудетто учун курашда "Ювентус"га чиндан жиддий рақиб пайдо бўлдими? Бугун сиз билан янги мавсум фаворитларидек кўринаётган икки жамоа таркибларини солиштириб кўрамиз.

"Ювентус"нинг устун тарафи 

Биринчи навбатда тажрибада ва деярли ҳамма уларнинг чемпион бўлаверишига ўрганиб қолганида. "Кекса Синьора" сўнги олти мавсумда мунтазам чемпион бўляпти, туринликлар А серияда тенгсиз деган номни ва ғолиблик руҳини қайтара олишди. Уч йил ичида икки бор Чемпионлар Лигаси финалида майдонга тушишга муваффақ бўлдилар. Ваниҳоят таркиб борасида ҳам "Юве" ҳамон Италиянинг энг зўри. "Милан" яна қанча пул сарфласа ўз рақибига номлар борасида етиб олади. 100, 150 балки 200 миллион евро керакдир?  

"Ювентус"нинг оғриқли нуқтаси 

Айтишларича, ғалабани қўлга киритишдан, уни ҳимоя қилиш, қўлда сақлаб қолиш қийинроқ бўларкан. Чемпионликни еттинчи бор ҳимоя қилиш зарур бўлсачи? Етарлича иштиёқ бўладими футболчиларда? Ички чемпионатда чемпионликдан бироз "тўйиб қолган" жамоа асосий эътиборини Чемпионлар Лигасидаги ғалабага қаратса, бу "қайта тирилаётган" "Милан"га яхши вазият яратиб берар?

"Милан"нинг устун тарафи 

Мана неччи йилдирки мунтазам чемпион бўлиб келаётган жамоа рақибига бирор жабҳада устунлик бериш аҳмоқлик дерсиз, аммо... Мана мисол учун "Ювентус"ни биламиз, жамоа ўйини, кучли тарафлари ҳеч кимга сир эмас. Бонуччи ва Дани Алвес кетгани билан жамоа ўйини тубдан ўзгариб кетмайди. Бироқ ҳозирги "Милан" - Италия футболи учун янги лойиҳа ва биз бу йигитлар қачон ва қанчалик ёрқин нур сочишлари мумкинлигини олдиндан айта олмаймиз. 

"Милан"нинг кучсиз тарафи 

"Россонери" ҳали давом этаётган трансфер ойнасининг ўзидаёқ кўплаб янги футболчиларни харид қилдилар. Уларнинг аксари асосий таркибга киришга ҳаракат қилади ва ниятига етади ҳам. Янги таркиб, янги жамоа учун ҳар доим маълум вақт керак бўлиши табиий ҳол. 

Кимнинг таркиби кучлироқ?

Ҳали чемпионат бошланиб улгурмаган бўлса ҳам "Милан" баъзи устунликларга эга. Бундан икки ойча аввал ҳам "Ювентус" рақиб "Милан"дан ҳар бир чизиқда кучлироқ эди. Аммо бугунга келиб, амалга оширилган трансферлардан сўнг, тарози палласининг ҳолати бироз ўзгаргандек. Табиийки, бу ҳали жамоалар таркибининг якуний кўриниши эмас. 

Асосий таркиблар:
"Ювентус" (4-2-3-1): Буффон – Де Шильо, Кьеллини, Бенатиа, Алекс Сандро – Хедира, Пьянич – Дуглас Коста, Дибала, Манджукич – Игуаин.

"Милан" (4-2-3-1): Доннарумма – Конти, Бонуччи, Романьоли, Родригес – Билья, Кесси –Чалханоглу, Бонавентура, Сусо – Андре Силва.


Дарвозабонлар:  Буффон vs Доннарумма = дурранг

Узр, Джиджи. Сен нафақат бу ёш йигит билан солиштирганда, балки футбол тарихидаги энг яхшилардан бирисан. Лекин алоҳида олинган бир мавсумда болакай Доннарумма чемпионлик баҳсида кекса Буффондан қолишмаслиги ва муҳим роль ўйнаши мумкин. Ҳар икки посбоннинг кучини бутун дунё билиб бўлди ва улар жамоалари учун зарур пайтда ўйинларни ютиб беришлари мумкин. 

Ҳимоячилар: 

Де Шильо vs Конти = "Милан" устунлиги

Бу икки ҳимоячи баҳсида "Аталанта"да ажойиб мавсум ўтказган ва азалдан "Милан" мухлиси бўлган Конти устунроқ чамамда. Тўғри, Де Шильо ҳам "Ювентус"да ўзига келиши ва иккинчи ҳаётини бошлаши мумкиндир, лекин ҳозир ундай эмас. Аслида "Юве" бу нуқтага ҳали "Валенсия"даги Канселуни олиб келиши ҳам мумкин, бироқ у энди бошқача вазият бўлади. 

Бенатиа vs Бонуччи = "Милан" устунлиги


"Ювентус"нинг энг кучли ҳимоячиларидан бири Бонуччи "Милан"га 42 миллион еврога тушганидан хабарингиз бор албатта. Ва агар миланликларнинг иши юришиб биз Италия чемпионатида ҳам чинакамига кураш гувоҳи бўлсак, кўпчилик айнан шу трансферни ҳал қилувчи деб атаса не ажаб. Бонуччи ўзининг собиқ жамоадошларининг исталгани билан рақобатлаша олади ва устунликка ҳам эга бўлади. Шундай экан, Леонинг қаршисида ким туришидан қатъий назар натижа ўзгармайди. 

Кьеллини vs Романьоли = "Ювентуса" устунлиги

Тўғри, Романьоли ёши каттароқ ҳамкасби Кьеллинига тенглаша олмайди, аммо тан олинг ўртадаги фарқ унчалик катта эмас. Шу ўринда ўтаётган ҳар бир кун Джорджога қарши ишлаётганини қўшиб қўйинг. "Кекса сеньора"нинг "қарияси" яқинда 33 ёшга тўлади.

Алекс Сандро vs Родригес = "Ювентус" устунлиги

Сандро – ўз нуқтасида дунёнинг энг кучлиларидан бири. Родригес эса яқин ўтмишда ҳам шу каби номга курашаётганлар қаторида эътироф этиларди. Балки унинг кейинги поғонага ўтиши "Вольфсбург"да қолиб кетгани билан боғлиқдир. Мана энди "Милан"да "перезагрузка"ни кўрармиз. Аммо ҳозирча "Юве" ғолиб, бироқ яна миланликлар курашсиз таслим бўлишмаяпти. 


Ярим ҳимоя ва ҳужум ортидагилар

Хедира vs Кесси = "Ювентус" устунлиги

Тажрибали Жаҳон чемпиони ва фаолиятининг энг ёрқин йиллари олдинда турган африкалик, сиз кимни танлардингиз? Мавсумолди ўртоқлик турнирларидаги бир-иккита ўйин билан хулоса чиқарманг. Тўғри Кесси "Бавария"га қарши кучли ўйин ўтказди, аммо... Табиийки, вазиятга кенгроқ назар солсак, танлов Хедира фойдасига бўлади. Аммо Самининг Франкдан кам эмас, кўп эмас 10 ёшга каттароқ эканлиги ва жароҳатлар билан яқин "ўртоқли"ги... Фикрингиз ўзгариб қолмаяптими?

Пьянич vs Билья = "Ювентус" устунлиги

"Лацио"нинг собиқ футболчиси Италия миқиёсида юқори баҳоланади, лекин Пьяничдан юқорироқ эмас. Миралем ҳам ёшроқ, ҳам иқтидорлироқ. Акс ҳолда ўтган ёз Туринга Пьянич эмас Билья кўчиб ўтармиди. 

Дуглас Коста vs Чалханоглу = дурранг

Коста яхшироқ "авторитет"га эга. Ахир у "Бавария"да ўйнаб улгурган. Аммо Чалханоглу ҳам текинга офтобга чиқадиганлардан эмас. Германия Бундеслигасидан келган меҳмонлар борасида якуний қарорни чиқаришга ҳали бироз эртадек. Ким A серияга тезроқ мослашиб кетади бунисини вақт кўрсатади.

Дибала vs Бонавентура = "Ювентус" устунлиги


Бонавентура – кучли футболчи, лекин Дибала – дунёнинг энг иқтидорли ёшларидан бири. Мутахассислар бекорга яқин йилларда айнан Дибала "Олтин тўп"лар олади демаса керак. Ахир аргентиналикнинг кучга тўлган йиллари Месси ва Роналдо "ўйиндан чиққан" йилларга тўғри келади. 

Манджукич vs Сусо = "Ювентус» устунлиги

Бу икки футболчи ўз жамоаларида бир хил нуқтада ўйнай олишса ҳам уларни ўзаро солиштириш мушкул вазифа. Сабаби ўйин услуби тубдан фарқ қилади. Манджукичга устунлик берганимизнинг сабаби оддий, у тажрибалироқ ва стабил ўйин намойиш этади. Сусо эса ҳозирча катта футболдаги ўрнини излаш билан оввора. Ўша стабиллик ва тажриба нисбатан камроқ "Милан" вакилида. 

Ҳужумчилар:

Игуаин vs Андре Силва = "Ювентус" устунлиги


Кимга ёқади, кимгадир йўқ, лекин Игуаин яхши ҳужумчи эканлигини исботлаб бўлган. Тўғри, унинг "коллекциясида" ўта омадсиз ўйинлар ҳам кам эмас, аммо умуман олганда у ўз ишининг устаси. Бўлмаса "Юве" уни катта пул эвазига сотиб олмаган бўларди. Андре Силва эса нималарга қодирлигини энди кенг оммага намойиш этади. 
Лекин кўп чизиқларда бўлганидек, бу ерда ҳам "Милан"нинг ўзига хос устунлиги мавжуд. Ахир ёш иқтидор соҳиби эртага ўша Гонсалодан ўтиб кетмайди деб ким айтди?

Якуний хулосани ҳар ким ўзи учун қабул қила қолсин. Ҳозирги вазиятда "Юве" мухлислари ҳали хотиржам ўтиришлари мумкиндек. Қайта тикланаётган "Милан" эса рақобатга дош бера олса ва таркибдаги ёш футболчиларга керакли шароитларни яратиб, уларни ўзида сақлаб қола билса, яқин йиллар ичида биз "россонерилар" ижросида "шавқатсиз ўч олиш"нинг гувоҳи бўламиз. "Кекса синьора"нинг "кекса" футболчилари ўзларининг энг кучли йилларини ўтказиб бўлишди. Таркибда 30 ёш атрофидаги ва ундан ошганлар анчани ташкил қилади. "Милан"да эса ҳаммаёқ ёшлар: Доннарумма 18 ёш, Романьоли – 22 ёш, Кесси – 20, Андре Силва – 21, Конти, Чалханоглу ва Сусо – 23 ёшдан. 

Бевосита янги мавсумга тўхталсак, ҳақиқатдан ҳам Пирло айтганидек ҳозирча "Ювентус" гегемонлигига ҳеч нарса раҳна солмаяпти, аммо "Милан" яқин келажак учун кучли жамоа тайёрлаётгани ҳам бор гап.


Омонжон Тўхтамирзаев

Рейтинг: +24   

Фикрлар

championat.asia
< сўнгги янгиликларни кўриш
Яндекс.Метрика