"Челси" Канте билан шартнома борасида келиша олмаяпти. У ёзда текинга кетиши мумкин

Канте билан янги шартнома бўйича музокаралар 2021 йилда бошланган. "Челси"нинг аввалги раҳбарияти ярим ҳимоячига "3+1" тузилмаси бўйича шартнома таклиф қилган, бироқ Буюк Британия ҳукумати Роман Абрамовичга нисбатан санкциялар киритгач, музокаралар тўхтатилган.

"Кўклар" янги раҳбарияти август ойида Н'Голога "2+1" схемаси бўйича янги шартномани оғзаки равишда таклиф қилган. Айни дамда ярим ҳимоячи бу вариантга рози эмас, чунки у узоқроқ муддатга мўлжалланган битимга имзо чекмоқчи, дея хабар беради "The Athletic".

31 ёшли франциялик футболчи музокараларда муваффақиятга эришилмаса, келаси ёзда клубни текинга тарк этади.

Ушбу ёзда "Челси" 33 ёшли ҳужумчи Пьер-Эмерик Обамеянг билан "2+1" кўринишида келишув имзолаган бўлса, июль ойида Кантенинг тенгдоши Калиду Кулибали билан тўрт йиллик шартнома тузилган эди.

"Кўклар" собиқ бош мураббийи Томас Тухелнинг фикрича, Канте олган жароҳатлар сони клуб раҳбариятида шубҳа уйғотади. Хавбек жорий мавсумда "Челси"нинг мавжуд 7 та ўйинидан 5 тасини ўтказиб юборди.

Канте Лондон клубида анча машҳур, шунинг учун улар у билан шартномани узайтиришни исташади. Футболчи ҳам бу жамоада ўйнаёётганидан жуда хурсанд – Н'Голо фаолиятини "Челси"да якунлашга тайёр. Аммо бунинг учун томонлар шартнома бўйича музокаралар олиб боришда муроса топишлари керак бўлади.

Қайд этилишича, Англиянинг икки клуби, шунингдек, Испания, Германия ва Франция жамоалари таянч ярим ҳимоячиси атрофидаги вазиятни кузатиб боришмоқда.

Канте "Челси"да 2016 йилдан бери ўйнаб келмоқда. Клуб билан у АПЛ, Чемпионлар Лигаси, Европа Лигаси, Европа Суперкубоги, Англия Кубоги ва клублар ўртасидаги ЖЧда ғолиб чиққан.