"Бунёдкор": Озодбек Назарбековдан миннатдормиз!

Байрам кечасидаги хонандалар чиқишларини Ўзбекистон ва Қорақалпоғистон халқ артисти Озодбек Назарбеков очиб берди. Эътиборлиси айнан Назарбеков томонидан “Бунёдкор” ФК учун куйланган мадҳия тадбирда янграган илк тарона бўлди. Элимиз суйган хонанда “Бунёдкор” қўшиғини жонли равишда ижро этиб, маросим қатнашчиларини хушнуд этди.

Озодбек Назарбеков ўз чиқишини якунлагач, унга “Бунёдкор” аъзоси Анвар Ғофуров миннатдорчилик дипломини топширди. Ушбу эсдаликда қуйидаги сатрлар битилган.

2013 йил “Бунёдкор” футбол клуби учун жуда ҳам омадли бўлди. Асосий жамоамиз ўз тарихида бешинчи маротаба Ўзбекистон чемпионлигини ва тўртинчи бор мамлакат кубогини қўлга киритди. Шунингдек, ёшларимиз клубнинг пойдевори мустаҳкам эканлигини амалда исботлаб, Ўзбекистон ёшлар лигасида ғолиб чиқдилар.

Бу муваффақиятларга эришишимизда, шубҳасиз, Ўзбекистон ва Қорақалпоғистон халқ артисти Озодбек Назарбековнинг хизматлари беқиёсдир! "Бунёдкор" футбол клуби жамоаси Озодбек Назарбековнинг катта ёрдамини ҳар доим ва ҳар ерда ҳис этиб туради.

Биз билан бирга эканлигингиздан миннатдормиз!

П.С.Таъкидлаш жоизки, жорий мавсумда “Бунёдкор”нинг уй учрашувлари танаффус пайтида Озодбек Назарбековдан ташқари яна бир қатор эстрадамиз юлдузлари ҳам иштирок этишди. Ана шундай хонандалардан Шохжаҳон Жўраев, Даврон Эргашев, Алишер Файз, Самандар Ҳамроқулов, Лариса Москалёва, Валижон Шамшиев, Отабек Муталхўжаев, Равшан Собиров, Улуғбек Исмоилов, Оролмирзо Сафаров, “Шод” ва “Зарба” гуруҳларига “Бунёдкор” ФК ўз миннатдорчилигини билдиради.