Bizga ma'lum bo'lishicha, markazlashgan chempionatda karantin qoidalariga yanada chuqur amal qilinishi ko'zda tutilgan. PFL sayti bugungi o'yin oldidan PZR testini topshirmagan har ikki klub vakillarini e'lon qildi. Xabarda yozilishicha, ro'yxatda ism-familiyasi keltirilgan shaxslar o'yin paytida nafaqat texnik zonada bo'lishlari, balki jamoa avtobusiga chiqishlari ham mumkin emas.
Ammo PFL telegram kanali e'lon qilgan suratda "Bunyodkor" katta murabbiyi Marat Miftaxutdinov avtobusdan tushib kelayotganini ko'rish mumkin. Shunday ekan savol tug'iladi: bu birinchi kundanoq qoidani buzish deganimi? Ma'lumki, dushanba kunidan markazlashgan tartibda birinchi davraning oxirgi to'rtta turiga start beriladi. Agar hozirdan qoida buzish boshlansa, unda boshqa uchrashuvlarda nima bo'ladi?
O'ylaymizki, PFL ushbu holat yuzasidan tushuntirish beradi.
