Бундеслига, 3-тур превьюси

Леверкузеннинг "Байер" жамоаси ўз майдонида Бременнинг "Вердер" клуби билан куч синашади. Айни пайтда турнир жадвалида пешқадамликни сақлаб турган Рогер Шмидт шогирдлари ўзларининг муваффақиятли юришларини давом эттиришлари учун Робин Дутт бошчилигидаги "қўшин" устидан ғалаба қозонишлари талаб этилади. 

"Байер" ушбу мавсумни кўтаринки руҳда бошлади. Мавсум старти олдидан Рогер Шмидт шогирдларини иккинчи турдан сўнг 100 фоизлик натижа қайд этиб туришларига ҳеч ким ишонмасди. Сабаби, тақвим "аспиринликлар" учун у қадар осон тушмаганди. Дастлабки турда Дортмундда "Боруссия"ни таслим этган "Байер" ушбу мавсумда ўз олдига юксак мақсадлар қўйганини ҳаммага эслатиб қўйди.

Уларнинг асосий рақиблари "Боруссия Д" ва "Бавария" жамоалари ҳозирга келиб очко йўқотишга улгуришган. Бу нарса ҳам "Байер" клубини янада дадилроқ ўйнашларига тўртки бўлиши мумкин. 

Бу турда жамоа "Вердер" тўсиғидан эсон-омон ўтиб олишлари муҳим аҳамият касб этади. 

Мавсум олдидан ўз таркибига ўтган йилда "Гамбург" сафида шов-шув кўтарган Ҳакан Чалханоглуни қўшиб олди. Бу футболчи билан биргаликда Карим Беллараби ушбу мавсумда "Байер"нинг етакчи футболчилари бўлиши кутилмоқда ва дастлабки турларда айнан шу икки футболчилар "Байер"нинг ғалабаларига ўзларининг салмоқли ҳиссаларини қўшишга муваффақ бўлишди.

"Вердер" эса бугунги баҳсда очко йўқотмаслик учун майдонга тушиши аниқ. Бременликлар бундан олдинги турларда фақат дуранг ўйнашди ва ҳозирча ғалаба нималигини билмай келишмоқда. Шунингдек, улар ҳали мағлубиятга ҳам учрашмаган. "Вердер" камига айнан шу анъанани сақлаб қолиш мақсадида ҳам Леверкузендан очко билан қайтишни режалаштирган бўлишлари табиий.

Бугунги ўйин кескин курашларга бой бўлиши аниқ. Бу жамоалар ўртасидаги баҳс ҳар доим қизиқарли ва голларга бой бўлган. Ўйин фаворити албатта мезбонлар ҳисобланишади. Ҳозирча мағлубиятга учрамаган жамоалар тўқнашувида ким ғолиб бўлишини тахмин қилиш қийин.

Эртага бундеслиганинг яна олтита ўйини бўлиб ўтади. 

Германиянинг амалдаги чемпиони "Бавария" жамоаси "Альянц-Арена"да "Штутгарт" билан баҳслашади. Марко Ройссиз қолган "Боруссия Д" "Фрайбург"ни синовдан ўтказади. Фирмино етакчилидаги "Хоффенхайм" "бўрилар" лақаби остидаги "Вольфсбург" билан беллашади.

Берлиннинг "Герта" клуби бу турда япониялик "снайпер" Оказаки тўп сурадиган "Майнц" билан тўқнаш келади. 

Ўтган мавсумни бундеслига-2да ўтказган иккала дебютант "Падерборн" ва "Кёльн" жамоалари ушбу турда ўзаро куч синашишади. Мёнхенгладбахнинг "Боруссия"си эса ўтган турда Гвардиола шогирдларидан очколарни тортиб олган "Шальке"га қаршилик қилишади.

Якшанба куни эса бундеслиганинг учинчи туридан ўрин олган сўнгги иккита учрашув ўтказилади.

Франкфуртнинг "Айнтрахт" клуби ўз майдонида "Аугсбург"ни қабул қилса, "Ганновер" - "Гамбург" учрашуви билан турга якун ясалади. 

Мюнхеннинг "Бавария" жамоаси ушбу турда ўтган учрашувдаги камчиликлар ўрнини қоплаш мақсадида, чемпионлар лигасидаги "Манчестер Сити"га қарши баҳсга ҳам жиддий тайёрланиб олади. Бу ўйинда мюнхенликлар таркибида Арьен Роббеннинг кўриниш бериши ҳозирча номаълум. Ўтган турда "Шальке"га қарши баҳсни жароҳати сабаб ўтказиб юборган голландиялик вингер бу учрашувда майдонга тушиши сўроқ остида. Шунингдек, катта эҳтимол билан яқиндагина харид қилинган Мехди Бенатия "Штутгарт"га қарши беллашувда ўзининг янги жамоасидаги дебютини нишонлаши мумкин. Жароҳати сабаб мундиални ТВ қаршисида томоша қилган франциялик футбол юлдузи Фран Рибери ниҳоят яшил майдонга қайтиш эҳтимоли юқори. Франк Рибери жароҳатидан буткул соғайган ва бу белашувда жамоасига ёрдам бериши кутилмоқда.

Чемпионатни ўз майдонидаги мағлубият билан бошлаган "Боруссия Д" иккинчи турда меҳмонда "Аугсбург"ни қийинчилик билан мағлубиятга учратди. Дортмундликлар ҳимоя чизиғида айни пайтда муаммолар мавжуд. Матс Хуммельснинг йўқлиги жамоанинг орқа чизиғида катта бўшлиқ пайдо қилмоқда. Учинчи тур олдидан эса Марко Ройс терма жамоа йиғинидан жароҳат билан қайтгани эса Юрген Клопп ортиқча бош оғриқлар тақдим этди. "Боруссия Д" жамоаси ҳозирча фақат Шинжи Кагаванинг қайтганидан хурсанд бўлиб, "Фрайбург"га қарши ўйинга тайёргарлик кўришмоқда. Адриан Рамос "Аугсбург"га қарши ўйинда янги жамоасидаги голлар сонини очиб олди ва мухлислар бу турдаги баҳсда ҳам Адриан Рамосдан муваффақиятли ўйин кутиб қолишлари аниқ. 

Ўтган турда катта сенсацияга қўл урган икки дебютантлар "Кёльн" ва "Падерборн" клублари меҳмонда ишончли ва йирик ғалабаларни қўлга киритишганди.  Энди эса ушбу жамоалар бир-бирлари билан баҳс олиб боришади. Ҳозирча ўз дарвозасидан тўп олиб чиқмаётган "Кёльн" жамоаси меҳмонда "Падерборн" билан куч синашади. Ушбу беллашув ҳам мухлис ва мутахассисларда катта қизиқиш уйғотмоқда. 

Бундеслиганинг ҳар бир учрашувлари ноодатий ҳолатлар ва қизиқарли вазиятларга бой ўтиши табиий. Ҳақиқий футбол завқини ҳис этиш учун Германия футболини ҳавосидан ТВ орқали бўлсада  нафас олиб туриш зарар қилмайди. 

Кучлилар футболини томоша қилиш ҳеч кимни зериктириб қўймайди.

Бундеслига, 3-тур.

12 сентябрь, жума.

"Байер" - "Вердер" (23:30)

Йўқотишлар -

"Байер" : Юлиан Брандт, Симон Рольфес.

"Вердер": Раиф Хусич, Цандер, Теодор Гебре-Селасси, Озкан Йилдирим, Юлиан фон Хаке, Филипп Баргфреде, Седрик Макиади.

13 сентябрь, шанба. 

"Бавария" - "Штутгарт" (18:30)

Йўқотишлар -

"Бавария": Рафинья, Вайзер, Бастиан Швайнштайгер, Тиаго Алькантара, Хави Мартинез. "Штутгарт": Даниэль Гинчек, Тим Ляйбольд, Сержан Сарарер, Робин Ялчер, Мохаммед Абделлауз.

"Боруссия Д" - "Фрайбург" (18:30)

Йўқотишлар -

"Боруссия Д": Златан Аломерович, Матс Хуммельс, Марко Ройс, Якуб Блашчиковски, Нури Шахин, Оливер Кирх, Илкай Гюндоган, Жи Дон Вон.

"Фрайбург": Даниэль Бац, Саша Ритер, Денис Пергер, Кристофер Жюйен, Карим Гёде. 

"Хоффенхайм" - "Вольфсбург" (18:30)

Йўқотишлар -

"Хоффенхайм": Кун Кастельс, Александр Штольс, Ким Жин Су, Кевин Акпогума, Пирмин Швеглур.Надим Амири.

"Вольфсбург": Кристиан Треш, Фелипе Лопес, Иван Перишич, Оскар Завада.

"Герта" - "Майнц"  (18:30)

Йўқотишлар - "Герта": Мариус Герсбек, Себастьян Лангкамп, Александр Баумйоханн.

"Майнц": Пак Жу Чо, Николче Новески, Ракавица, Деванте Паркер.

"Падерборн" - "Кёльн" (18:30)

Йўқотишлар - "Падерборн": Мартин Амедик, Тим Велькер, Рафа Лопес, Альбан Меха, Мохир Шаглик, Виктор Майер. "Кёльн": Марсель Шуен, Роман Голобарт, Казуки Нагасава, Патрик Хельмес, Томас Брекер.

"Боруссия М" - "Шальке" (21:30)

Йўқотишлар -

"Боруссия М": Юлиан Корб.

"Шальке": Фабиан Гифер, Ян Киргхофф, Фелипе Сантана, Сеад Колашинац, Жефферсон Фарфан, Леон Горетцка.

14 сентябрь, якшанба.

"Айнтрахт Ф" - "Аугсбург" (18:30)

Йўқотишлар - "Айнтрахт Ф": Мартин Ланиг, Сонни Киттель, Ян Розенталь,  Нельсон Вальдес, Лука Вальдшмидт. "Аугсбург": Яннис Гелиос, Том Ридер, Александр Эссвайн, Ян Моравек, Ариф Экин, Макс Райнталер, Майк Уде, Шон Паркер.

"Ганновер" - "Гамбург" (20:30)

Йўқотишлар - "Ганновер": Маркус Миллер, Андре Хоффманн, Штефан Таскер, Флориан Баллас, Никлас Тайхгрэбер, Владимир Ранкович, Ларс Штиндль, Янник Шульце, Тим Дирссен, Себастьян Эрнст, Салиф Сане, Эдраг Приб, Вальмир Сулеймани.

"Гамбург": Александр Брунс-Цолльнер, Слободан Райкович, Марсель Янсен, Иво Ильевич, Вилле-Матти Штайнманн, Филипп Мюллер, Гидеон Юнг, Вальмир Нафиу, Эштон-Филипп Гетц, Гойко Качар, Масимилиан Байстер.

Шаҳбоз Беғамов тайёрлади.