Беш йилда дебютантдан А Сериянинг энг яхши тўпурарига айланган футболчи

"А Серияда дебют қилган пайтимда 30 ёшда эдим. Ўшанда "Интер"га қарши ўйнагандик. Босим? Йўқ, ҳеч қандай босим бўлмаган. Ишонасизми, ўйиндан олдин эрталаб соат тўртгача янгиликлар ўқиганман. Ўшанда малика Диана автоҳалокатга учраган эди. Лекин тунни бедор ўтказишимнинг сабаби у эмасди. Шунчаки шундай ҳаёт тарзига ўрганиб қолгандим. Керак бўлса, "Формула-1"ни тонгги олтигача томоша қилардим".

"Кам ухлардим ва кунига 3 килограммгача гўшт ер эдим. Бироқ бу ҳеч қачон менга муаммо туғдирмаган. Кийиниш хонасида ҳам, стадион туннелида ҳам, ҳаттоки танаффус пайти ҳам сигарет чекардим. Ҳафтада бир неча марта граппа (Италияда узумдан тайёрланадиган алкоголь ичимлик) ҳам ичардим. Майдонда қўлимдан келганча, бор кучим билан ҳаракатланардим ва бу менга етарли эди".

"Биз "Жузеппе Меацца"да майдонига тушдик. Стадионга тўпланган 85 минг томошабинни кўриб ўзимни йўқотиб қўяй дедим. Аммо баҳс бошланганида бор эътиборимни ўйинга қаратдим ва атрофдагиларни шунчаки хаёлимдан чиқариб ташладим. Биринчи учрашувданоқ гол уришга муваффақ бўлдим. Лекин, афсуски, биз мағлуб бўлдик".

Дарио Хюбнер А Сериянинг 5та мавсумида тўп тепди ва 74 та гол урди. У 2001/2002 йилги чемпионатда "Пьяченца" таркибида энг яхши тўпурар бўлишга эришди. Дарио ўшанда 35 ёшда эди.

Нозима Зарипова таржимаси