Бахтиёр Ашурматов: "Кейинги босқичга чиқиш вазифаси бажарилди, бироқ 1-ўринни қўлга киритиш масаласи ҳал этилмади"

- Ўйин ҳақида

- Ҳисоб ўйинга яраша бўлмади. "Дўстлик Олтиариқ" йирик ҳисобда ютқазишга лойиқ ўйиб кўрсатмади. Улардаги тиришқоқлик, ҳаракатчанлик ҳайратда қолдирди. Ҳисоб  4:1 бўлиб турган пайтда ҳам тўхташмади. Мўйдин Мамазулумов яхши савиядаги ҳужумчи эканлигини кўрсатди. Ҳимоячиларимизни бутун ўйин давомида таҳликада ушлаб турди. 

"Ғиждивон" билан кечган ўйинимиз ҳамда бугунги ўйинни солиштирсак, катта фарқ бор. Бугун хатолар кўпайиб кетди, тўпни кўп йўқотдик ва тактик тарафдан камчиликларимиз кузатилди. 

Кейинги учрашувларга бошқача муносабатда бўламиз. Машъал" билан баҳсда ҳам фақат ғалаба учун ўйнаймиз. Кейинги босқичга чиқиш вазифаси бажарилди, бироқ 1-ўринни қўлга киритиш масаласи ҳал этилмади. Кейинги баҳсда ижобий натижа кўрсатишимиз лозим, чунки бу кейинги босқич қуръасида устунлик беради. Шу сабабли биз охиригача кураш олиб борамиз. Эътибор берган бўлсангиз, деярли оптимал таркибни майдонга туширяпмиз. 

- Мурод Холмуҳаммедов ва Мурод Комилов хусусида нима дея оласиз?

- Мурод Холмуҳаммедов жароҳатдан тикланишда давом этяпти. Ўйлайманки, АГМКга қарши ўйнай олади. Мурод Комиловга келсак, унга секин-аста ишонч билдиряпмиз. У омадли йигит эканлиги кўзга ташланяпти. Чунки керакли вақтда керакли жойда пайдо бўлиб, гол уряпти. У ўз устида ишлаб, меҳнат қилишда бардавом бўлса, кейинчалик Ўзбекистон терма жамоасида ҳам фойда келтиради, деган умиддамиз.

- "Қўқон-1912" қачон ўз майдонида тўп тепади?

- Вазиятдан оз бўлса-да, хабардорман, бироқ бу савол менга тегишли эмас. Чунки бу масала билан клуб раҳбарияти шуғулланиши керак. 

Ҳали прожектор қўйилмагани сабабли майдонимизда ўйнолмаяпмиз. 

Яйпан иккинчи уюмиздек бўлиб қолган. Бизга  қадрдон, футболни севадиган инсонлар ишлашади. Уларга бизга яратиб бераётган шароит учун миннатдорлик билдирамиз.