Азим Аҳмедов: "Ўйинимдан қониқиш ҳосил қилмадим"

"Терма жамоадан чақирув олиш катта бахт, унда ўйнаш эса икки ҳисса бахт деб биламан. Энг аввало ёшларни йиғинда синаб кўрган мураббийимизга раҳмат. Тўғрисини айтсам, ўйиндан аввал қаттиқ ҳаяжон босди. Клуб ўз йўлига, аммо МТЖ либосини кийиш кишини жунбушга келтирар экан. Шунга бўлса керак, ўйиним қовушмади. Бу хато бошқа қайтарилмаслик учун яна кўпроқ ишлашим кераклигини тушуниб етдим. МТЖ назарига тушиш бахти ҳаммага ҳам насиб этавермайди, бундай имкониятдан самарали фойдаланишга ҳаракат қилишим керак. Акам ҳам ўйиндан кейин керакли маслаҳатларни бердилар, ўйин пайтида бир вазиятда уришдилар ҳам", - дейди Азим Аҳмедов.

- Одил билан бир жамоа сафида ўйнаш қандай бўлди?
- "Навбаҳор" ва "Пахтакор"да эмас, акам билан МТЖда бирга майдонга тушаман деб орзу ҳам қилмаган эдим. Буни бир сўз билан тушунтириб бера олмайман. Кеча асосан ёшлардан иборат таркиб тушганлиги боис, катталар бизга керакли маслаҳатларни бериб туришди. Машғулотлар давомида улардан янада кўп маълумотлар олишга ҳаракат қиламиз.