Аваз Бердиқулов: "ОФК ЎФАдан миннатдор"

Ушбу маросимдан кейин ОФК мусобақалар ўтказиш бўлими раҳбари, ўзбекистонлик Аваз Бердиқулов қисқа интервью берди.

- Нима учун U-23 Осиё чемпионати мезбони сифатида айнан Ўзбекистон танланди?
- Биласиз, 2022 йилги мазкур мусобақа Олимпиадага чиқиш мусобақаси эмас. ОФК ушбу турнирни 2023 йилги Осиё Кубогига тайёргарлик сифатида кўрган ва Хитойга мезбонлик берилганди. Аммо коронавирус айнан Хитойдан чиққанлиги, у ердаги пандемик вазият туфайли U-23 Осиё чемпионатини бошқа давлатга кўчиришга қарор қилдик. Мезбонлик бўйича бошқа мамлакатларга мурожаат қилдик. Улар орасида Ўзбекистон футбол Ассоциацияси тезда жавоб қайтарди ва мусобақани ўтказишга тайёрлигини билдирди, қисқа муддатда бу борада келишувга эришдик. Бунинг учун ЎФАга миннатдорчилик билдирамиз.

- Кейинги йилги мусобақа қайси стадионларда ўтади?
- Мусобақани учта стадионда ўтказишимиз керак. Биласиз, Осиё чемпионати финал босқичида 16та жамоа қатнашади. ЎФА томонидан иккита стадион Тошкентда, биттаси Наманганда бўлади деб таклиф беришган. Ҳозирча таклифларни ўрганиш билан бандмиз. Балки учала стадион ҳам Тошкентда бўлар, ёки ўйинлар бошқа вилоятларда ҳам ўтиши мумкин. Барчаси ЎФАнинг таклифига боғлиқ.

- Қуръа ҳақида нима дея оласиз?
- Ўзбекистон Осиё чемпионатида қатнашмаслиги керак эди. Сабаби мезбон сифатида тўғридан-тўғри йўлланмага эга бўлган. Лекин ЎФА билан келишган ҳолда Ўзбекистон U-23 терма жамоасини ҳам саралашга қўшдик ва унинг натижалари ҳисобга олинмайди. Ўша гуруҳдаги учта жамоанинг натижалари инобатга олинади холос. Ўзбекистон учта ўйинни ўртоқлик мақомида ўтказади. Гуруҳда Саудия Арабистони ва Кувайт каби кучли термаларга қарши баҳслар Ўзбекистонга ҳам анча фойдали бўлади деб ўйлайман.