Асрор Алиқулов: "Таркибимиз ёш бўлишига қарамасдан, Суперлигага чиқиш учун ўйнаймиз"

- Ўйинда қўшимча таймлар бўлишини кутмагандик. Суперлига ва Про-лига жамоалари футболчиларининг жисмоний тайёргарлигида катта фарқ бор. Ўйиндан олдин биз имкон даражасида тезроқ ўйнаб, бўш ҳудудлардан унумли фойдаланишни ният қилгандик. Умуман олганда кўзлаган қайсидир мақсадларимизга эришдик. Афсуски, биринчи бўлимда голга тортадиган ажойиб вазиятдан унумли фойдалана олмадик ва ўз хатомиз эвазига гол ўтказиб юбориб, мағлуб бўлдик. АГМКНи кейинги босқичга чиққани билан табриклайман. Йигитларнинг бугунги ўйинидан мамнунман. Улар ўзларининг ажойиб характерини кўрсатиб, сўнгги дақиқаларгача ўйинни қутқариб қолиш учун ҳаракат қилишди.

Албатта, барчага имконият берилади. Ҳозирда "Машъал"нинг кўплаб футболчилари Суперлиганинг бир неча жамоаларида фаолият олиб боришмоқда. Суперлигага чиқсак ушбу футболчиларни қайтариб оламиз ва уларга имконият берамиз. Ҳозирги таркибимизда эса ёш футболчилар жуда кўп. Улар ҳар бир ўйинни бир текисда ўтказа олишмайди. Аммо таркибимиз ёш бўлишига қарамасдан, биз Суперлигага чиқиш учун ўйнаймиз.