АПЛ. Британиянинг энг йирик тўқнашувига бағишланган превью

Бугун эса турнинг марказий баҳси ҳисобланган "Манчестер Юнайтед" ва "Ливерпуль" жамоалари ўртасидаги ўйинга бағишланган превьюни ўқишингиз мумкин.

АПЛ, 21-тур
"Манчестер Юнайтед" – "Ливерпуль"
15.01.2017, 21:00. "Олд Траффорд"
Бош ҳакам: Майкл Оливер (Нортумберленд)

Премьер-лига 21-турини марказий баҳс якунлаб беради. Бу ҳафта футбол уик-эндининг энг асосий баҳси. "Орзулар театри"да ўтадиган супер ўйинда "Манчестер Юнайтед" ҳамда "Ливерпуль" жамоалари ўзаро беллашадилар. Бу икки клуб Англиянинг энг йирик жамоалари ҳисобланишади, уларнинг ҳисобида биргаликда 38та чемпионлик соврини бор. Бу "Туманли албион" учун фантастик кўрсаткич. Англиянинг энг совриндор икки клуби ўртасидаги ўйин Британия футболидаги энг катта тўқнашув ҳисобланади.

Айни пайтда "қизил иблислар" яхшироқ формада. Жамоа "Boxing Day"дан осон ўтди. "Ливерпуль" эса охирги икки учрашувда бироз оғирроқ ҳаракат қилди. Футболчилар бироз чарчагандек кўринишди. Лекин, чемпионат ўйинлари орасидаги қисқа танаффус футболчиларнинг ўзларини тиклаб олишларига ёрдам берган. Клопп маълум вақт Коутиньонинг хизматларидан фойдалана олмади. У қайтганда эса бошқа бир етакчи Мане терма жамоасига кетиб қолди. Бундай ҳолатда германиялик мутахассис ёки қанотга Лалланани қўяди, ёки Фирминони қанотга қўйиб, олдинга Старриж ва Оригилардан бирини туширади. Агар Хендерсон майдонга тушса, Лаллана ўнг қанотга ўтади. Чунки, бундай ҳолатда Адамнинг марказдаги ишини Эмре Жан ва Вейналдумлар бажара олишади.

"Манчестер Юнайтед" бир маромга тушиб олди. Жамоанинг чемпионатдаги ғалабали серияси 6та ўйинга етди, барча мусобақаларда эса 9та. Энг олдинда ҳаракат қилаётган Ибрагимович исталган ҳимоячига каттагина муаммоларни туғдириб бера оляпти. Ҳаводан узатиладиган паслар асосан унга қўналтирилади, баъзида ҳаводан Погбага ҳам ўйнаб туришади. Моур олдидаги асосий вазифа марказий ҳимоячилар жуфтлигини танлаш ва икки қанот ярим ҳимоясига кимларни тушириш. Рохода кичик жароҳат борлигини ҳисобга олсак, ҳимояда Смоллинг ва Жонс жуфтлигини кўришимиз мумкин. Агар Рохо ўйинга тайёр бўлса албатта тушади. Қанот ярим ҳимоясида эса тезкор рақибга қарши Мхитарян ва Марсиалларни кўришимиз мумкин. Рэшфорд эса захирадан тушиб, ҳимоячиларга муаммолар туғдириши шубҳасиз. Мата ва Руниларни эса асосий таркибда тушишига кафолат йўқ.

Футболчилар ҳолати

"Манчестер Юнайтед" таркибида Эрик Байи Африка миллатлар кубогида иштирок этиш учун учиб кетган. Бундан ташқари, Златан Ибрагимович "Халл Сити"га қарши Лига кубоги ярим финалини бетоблиги боис ўтказиб юборди. Маркос Рохо эса "Рединг"га қарши Англия кубогидаги учрашувнинг 1-бўлимида эски жароҳатини қайталаб олган эди. Лекин, Моуриньо уларнинг ҳар иккиси ўйинга тайёр бўлишларига умид қилаётганини таъкидлаб ўтди. Айниқса, Ибранинг майдонга тушиш эҳтимоли катта.

"Ливерпуль"да жамоанинг энг тез ва кўп югурадиган футболчиси Садио Мане Африка миллатлар кубогига кетган. Клубнинг асосий етакчиси Филлиппе Коутиньо эса жароҳатидан қутулди ва ҳафта ўртасида ўтказилган Лига кубоги ярим финалида захирадан майдонга тушди. Катта эҳтимол бугун ҳам бразилияликни майдонда кўрамиз. Бундан ташқари, Жордан Хендерсон ва Жоэль Матипларда жароҳат бор эди. Лекин, юқоридаги уч футболчи ҳафта ўртасидан бошлаб машғулотларда тўлиқ иштирок этишди.

Жозе Моуриньо vs Юрген Клопп

Бугунги беллашув мураббийлар қарама-қаршилиги ҳам бўлади. Моуриньо ва Клопп замонавий футболнинг энг кучли ва машхур мутахассисларидан ҳисобланади. Уларнинг ҳар иккиси ҳам жамоатчилик билан яхши ишлайди. Иккисида ҳам ўзи ҳос ўйин услуби бор. Улар ўйин пайтида эътиборни торта олишади. Клоппнинг майдон чизиғи олдида жизғанак бўлиши-ю, Моуриньонинг кутилмаган ҳаракатларни амалга ошириб қолиши ўйинга қўшимча ажиотаж бағишлайди.

Мухлислар тўқнашуви

Англиянинг икки фантастик мухлисларга эга клублари ҳам айнан бугунги ўйин қаҳрамонларидир. Сиз бугун яхши маънода дахшатли атмосфера гувоҳи бўласиз. Учрашувни интершум баландроқ қўйилган каналда кўришингизни маслаҳат берамиз. "Олд Траффорд" ҳамиша мухлислар билан тўла бўлади. Агар бу ерга "Энфилд"дан меҳмонлар келишсаку, олқишлашнинг энг юқори чўққисини кўрасиз. Бир томонда ливерпулликлар "You'll Never Walk Alone" дея куйлашса, бир томонда манчестерликлар "Glory Glory Man United"ни 90 дақиқа давомида айтиб туришади.

Қизиқ:

- Бугунги беллашув ана шу жамоалар ўртасида Премьер-лига доирасидаги 50-ўйин бўлади. Олдинги 49та учрашувдан 27тасида "Юнайтед"нинг қўли баланд келган (9 дуранг, 13 мағлубият);
- Фақатгина Стивен Жеррард бу қарама-қаршиликда Уэйн Рунидан кўпроқ гол урган (8та). Руни бугун Премьер-лигада 450та ўйинда майдонга тушган 21-футболчига айланиши мумкин;
- Хуан Мата "Ливерпуль"га қарши охирги тўртта Премьер-лига ўйинида бешта голда иштирок этган (3 гол ва 2та голли пас);
- "Қизиллар" АПЛ доирасида айнан "Юнайтед"га энг кўп ютқазишган (27 мағлубият);
- Адам Лаллана бу мавсум Премьер-лигада 14та голда қатнашди (7та гол ва 7та голли пас). Бу инглиз футболчилари орасидаги энг яхши натижа.

Мураббийлар фикрлари:

Жозе Моуриньо ("Манчестер Юнайтед"): "Манчестер Юнайтед" бу мамлакатнинг энг катта клуби. Буни мен ҳам, сиз ҳам, бошқалар ҳам билишади. Кечирасиз-у, буни билмаслик жуда қийин.

Катта клубларга, катта ўйинчиларга, катта мураббийларга қарши ўйнаш осон эмас. Лекин, биз қандай керак бўлса шундай ўйнаймиз.

Бу жуда катта ўйин - ундан роҳатланинг".

Юрген Клопп ("Ливерпуль"): "Рақибларимиз ҳозир яхшироқ формада ва бир-бирини яхшироқ тушунмоқда.

Биз у ерга боришдан ва ўзимизнинг энг яхши сифатларимизни кўрсатишдан мамнунмиз".

Томонларнинг бу учрашувга бўлган муносабатларига "Ливерпуль" афсонаси Стивен Жеррарднинг сўзлари орқали таъриф бериб ўтамиз. Стиви Жи бир пайтлар шундай деган эди: "Биз мамлакат чемпиони бўлмаслигимиз мумкин, лекин мавсумда икки бор "Манчестер Юнайтед"ни мағлуб этишимиз шарт".


Толибжон Қосимов

Eplmanager.com сайтида бугун янги совринли лига ишга тушади. Жамоа тузинг ва совринларни ютиб олинг. Жамоа тузишга ўтиш