Алишер Никимбаев: "Равшан Эрматов борасидаги фикрим ўзгармаган"

Мутахассис "2019 йил июнь ойида Равшан Эрматов ЎФА вице-президенти этиб тайинланди. Орадан бир йил ўтгач, 'Афсуски, Эрматов ўз жамоасини шакллантира олмади' деган мазмунда пост қолдиргансиз. Ҳозир фикрингиз ўзгарганми?" деган саволга жавоб қайтарди.

"Бу борада фикрим ўзгармаган. Эрматов тайинлангач, баъзи жабҳларда ўсдик. Биринчи навбатда, халқаро авторитет масаласида юқориладик. Аҳмаджонов даврида кўп нотўғри қарорлар қабул қилинганди, ушбу қарорларни бекор қилинди. Бироқ янада юксалиш учун тўсиқлар мавжуд. Асосий тўсқинлик — кадрлар масаласи. Савияли кадрлар етишмайди. Бунинг олдини олиш учун дастлаб ўзимизникиларни (Аҳмад Тиллаев, Фарҳод Абдуллаев кабилар) қайтариш керак, мен ўзимни назарда тутмаяпман. Хорижлик мутахассисларни жалб қилишда ҳам эҳтиёткорлик билан иш тутиш керак. Хорижлик деган номи учун эмас, қайси йўналишда фойдаси тегишига қараб танланиши лозим. Барибир ўзимизда ҳам бундай шахслар топилади" — деди Никимбаев.