Александр Хомяков: "Вақт тиғизлиги туфайли U-21 жамоаси ўйинларига боролмаяпман"

Ўйин ҳақида

- "Пахтакор" жамоасини ғалаба билан табриклайман. Бугун бизнинг кунимиз эмас экан. Ўйин натижасига таъсир кўрсатган кўп жиҳат биринчи бўлимда содир бўлди. Биринчи бўлимда ўйинимиз қовушмади, кетма-кет голлар ўтказиб юбордик. Иккинчи бўлимда ўйинимиз жонланди, устунликка эга бўлдик. Ҳужумлар ташкил этдик, гол ҳам киритдик, бироқ буларнинг ҳаммаси бизни мағлубиятдан қутқариб қола олмади.

- Андижонлик мухлислар ҳақида фикрингиз қандай? Улар ҳақида ҳозир ҳамма жойда гапиришаяпти...

- Албатта, Андижонда футболни яхши кўришади. Бизнинг мухлислар энг яхши эканини ҳар доим ҳис қилганмиз. Бу каби қўллаб-қувватласангиз, сиз учун жуда ёқимли. Клубда мухлислар билан ишлаш амалиёти яхши йўлга қўйилган.

- Бугунги голларда марказий ҳимоячиларнинг хатолари кўзга ташланди. Ротация қилиш вақти келмадимикан?

- 3 та гол бу жуда кўп. Ҳимоячилар хатога йўл қўйди, тўғри. Лекин мағлубият учун бутун жамоа айбдор бўлади. Рақиб қарши ҳужумларда жамоамизда саросима кўзга ташланди. Бу саволга ҳозир аниқ жавобим йўқ.

- Марлен Чобанов, Суҳроб Бердиев каби футболчилар бугунгача майдонга туширилмади. Бунинг сабаби нима?

- Биз ҳозир жамоанинг оптимал таркибини шакллантириш борасида ишлаяпмиз. Менинг қарашларимга кўра, барча жараён босқичма-босқич амалга ошади.

- Сиз нега ўринбосарлар иштирокидаги ўйинларга келмайсиз?

- Бу вақт тиғизлиги билан боғлиқ. Бизда масъулиятли вазифа бор ва ишлашимиз керак. Имкон қадар боришга ҳаракат қиламан. Ёрдамчи мураббийлар менга ҳар бир ўйин жараёни ҳақида етарлича ахборот бериб боришади.